बुटवल । कपिलवस्तुमा सशस्त्र प्रहरी सवार ट्रक दुर्घटना हुँदा दुईजनाको मृत्यु भएको छ । शुक्रबार साँझ बाणगंगा नगरपालिका ३ सिउटीमा भएको सशस्त्र प्रहरीको ट्रक दुर्घटनामा साइकलमा सवार एक यात्रु र एकजना सशस्त्र प्रहरीको मृत्यु भएको हो ।

मृत्यु हुनेमा सवारी चालक सशस्त्र प्रहरी रमेश चौधरी र साइकलमा सवार स्थानीय अमर तङनामी रहेका छन् ।

चारनम्बरबाट तौलिहवातर्फ जाँदै गरेको सशस्त्र प्रहरीको ट्रक अनियन्त्रित हुँदै साइकलमा सवार यात्रीलाई ठक्कर दिँदै दुर्घटनामा परेको प्रत्यक्षदर्शीले बताएका छन् ।

दुर्घटनाबाट सातजना घाइते भएका छन् । तीनजनाको अवस्था गम्भीर रहेकाले थप उपचारका लागि बुटवल पठाइएको छ । थप ४ जनाको सामुदायिक अस्पताल चारनम्बरमा उपचार भइरहेको छ ।

सशस्त्र प्रहरी सवार ट्रकमा मदिरा भेटिएपछि स्थानीय आन्दोलित भएका छन् । उनीहरूले चालकले मदिरा सेवन गरेको आरोप लगाएका छन् । घटनाबारे छानबिन हुनुपर्ने उनीहरूको माग छ ।