काठमाडौं । यस वर्षको सेप्टेम्बर (असोज मध्येसम्म)मा उच्च रुप लिएको डेंगी संक्रमण अक्टोबर दोस्रो सातासम्म आइपुग्दा केही मत्थर हुँदै गएको छ । इपिडिमियोलोजी तथा रोग नियन्त्रण महाशाखाको तथ्यांकअनुसार अक्टोबरका ११ मा देशभर ५ हजार ९ जनामा संक्रमण पुष्टि भएको छ । 

गत सेप्टेम्बरमा मात्रै २७ हजार ५२९ जना डेंगी संक्रमित थपिएका थिए । गत जनवरीदेखि अक्टोबर ११ सम्म देशभर डेंगी संक्रमितको संख्या ३७ हजार १३१ पुगेको छ भने संक्रमणका कारण ४५ जनाको मृत्यु भएको महाशाखाको तथ्यांक छ । अक्टोबरका ११ दिनको तथ्यांक हेर्दा डेंगी संक्रमण घट्दै गएको शंकेत देखिने महाशाखाका किटजन्य रोग शाखा प्रमुख डा. गोकर्ण दाहाल बताउँछन् । 

“अहिलेलाई डेंगी संक्रतिको संख्या डिक्रिजिङ अर्डरमा छ, यही अवस्थाका आधारमा आगामी दिनमा संख्या घट्दैजाला भन्ने आंकलन हो,” डा. दाहालले भने । गतवर्ष ५४० जनामा सिमित डेंगी संक्रमण असोज अन्तिमसम्म मात्रै देखिएको थियो । तर, यसवर्ष संक्रमणले प्रकोपको रुप लिएकाले गत वर्षभन्दा एक महिना बढी लम्बिनसक्ने महाशाखाको आंकलन छ । तर, डेंगीका फाट्टफुट्ट केस मंसिर अन्तिमसम्म नै देखिने गरेकाले सतर्कता भने अपनाउन वरिष्ठ संक्रामक रोग विशेषज्ञ डा. शेरबहादुर पुनको सुझाव छ । 

डेंगी संक्रमण सार्नेे ‘एडिस’ जातको पोथी लामखुट्टे बिहान घाम उदाएको दुई घण्टापछिसम्म र साँझ घाम अस्ताउनुभन्दा २ घण्टाअघि बढी सक्रिय रहने भएकाले यो समयमा विशेष सतर्कता अपनाउन विज्ञहरूको सुझाव छ । घर वरिपरी पानी जम्न नदिनु, लामखुट्टे बस्नसक्ने झाडीहरू सफा गर्नु, गमला, टायर, ट्यांकी आदीमा पानी जम्न नदिनु, व्यक्तिगत सुरक्षाका उपाय अपनाउनु नै लामखुट्टेको टोकाइबाट बच्ने उपाय हुन् ।