गजल — १
गयौ तिमी, अक्षरविनाको डिको थियो
बाँकी कथा भोको पेट र रोटीको थियो
बारम्बार बल्झिरह्यो उही पुरानो घाउ
आखिरमा चोट भने एकैचोटिको थियो
ठक्कर खाएपछि न बोर्डलाई थाहा भो
सधैँभरिको चाल एउटै गोटीको थियो
त्यहीँमाथि आफन्तीहरूले धार उध्याइरहे
धन्न बच्यो बलिको बोको खोटीको थियो
कौडीको दरमा दौडिए पनि अथाह जीवन
अन्तिममा जीवनकथा उच्चकोटीको थियो ।
गजल — २
हावाहुरीबीचको शुभ बेला हौ तिमी
दियो जोगाउने हत्केला हौ तिमी
अहिले भीडमा हराएर भौँतारिरहेछु म
यो भीडको रमाइलो मेला हौ तिमी
सबै ढोका बन्द भइसक्दा नि जीवनमा
बचे खुचेको एउटै जस्केला हौ तिमी
आँखा चिम्म गर्दा तिमीलाई नै देख्छु
निदाउँदा बन्द नहुने परेला हौ तिमी
तीतै होस् बरु बोली सुन्न पाऊँ सधैँभरि
सुगरलाई निको पार्ने करेला हौ तिमी ।