काठमाडौं । बडादसैँमा घर फर्कने यात्रुले बसको टिकट पाउनै नसकेको गुनासो गरेका छन् ।

काठमाडौंको नयाँ बसपार्कस्थित टिकट काउन्टरमा शनिबार (आज) भेटिएका उनीहरूले घर जानका लागि बसको टिकट नै नपाएको दुःखेसो पोखेका हुन् । पाँच दिन धाउँदा पनि बसको टिकट नपाएको डोटीका हरि बिसीको गुनासो छ । बस व्यवसायी र प्रहरीले आफन्तलाई टिकट बाँड्ने गरेकाले पनि सर्वसाधारणले टिकट पाउने अवस्था नरहेको उनको भनाइ छ ।

कैलालीका कृष्ण टमाटाले बसको टिकट नपाएका कारण दसैँमा घर जान नै नसकिने अवस्था आएको बताए । उनले सरकारले टिकटको आवश्यक व्यवस्था नमिलाएर सर्वसाधारणलाई दुःख दिएको भन्दै आक्रोश समेत व्यक्त गरे ।

केही यात्रु भने टिकट नपाए पनि बसको क्याबिनतिर बसेर घर जाने तयारीमा थिए । नेपालगन्जकी दिलमाया खत्रीले टिकट पाउन मुस्किल भएकाले आफू क्याबिनतिर बसेर घर जाने तयारीमा रहेको बताइन् ।

बस व्यवसायीले दोब्बर मूल्य भाडा लिएर रिजर्भमा पनि यात्रुलाई ओसार्ने गरेको तर टिकट भने नदिएकामा यात्रुको चर्को गुनासो छ ।