काठमाडौं । चीनसँग जोडिएको रसुवागढी र तातोपानी नाका सञ्चालनमा आएसँगै नेपालमा धमाधम सामान आउन थालेका छन् । चीनको तिब्बत क्षेत्रमा कोरोनाको जोखिम बढेका भन्दै चीनले साउन २५ गतेदेखि दुवै नाका बन्द गरेको थियो । 

चीनले एकतर्फी रुपमा नाका बन्द गरेका कारण नेपालमा करिब एक महिना कुनै पनि सामान आयात हुन सकेको थिएन । सामान बोकेका कन्टेनरहरु सीमानाकामा रोकिएपछि व्यापारीहरु मर्कामा परेका थिए । 

नेपाल भ्रमणमा रहेका बेला चिनियाँ जनकंग्रेसका अध्यक्ष ली चान्सुले गत बुधबार राष्ट्रपतिसँगको भेटका क्रममा नाका खुल्ने बताएका थिए । त्यसलगत्तै कोरोना भाइरस जोखिम कायम हुँदाहुँदै पनि चीनले नाका खुला गर्ने निर्णय गरेको थियो । 

ली नेपाल भ्रमणबाट फर्केलगत्तै भदौ ३० गते बिहीबारदेखि रसुवागढी नाका सञ्चालनमा आएको हो । यता तातोपानी नाका भने लीको नेपाल भ्रमणभन्दा अघि साउन २५ गतेदेखि नै सञ्चालनमा आएको भन्सार कार्यालयले जनाएको छ ।

रसुवागढी नाका सञ्चालनमा आएको पहिलो दिन १४ वटा कन्टेनर नेपाल भित्रिएका थिए । शुक्रबार २१ वटा कन्टेनर नेपाल भित्रिएका छन् । बिहीबार १४ र शुक्रबार २१ वटा कन्टेनरबाट अधिकांश रेडिमेड फेन्सी सामान आएका छन् ।

नाका खुला भएसँगै व्यापारीहरुलाई ठूलो राहत पुगेको हिमालयन सीमापार व्यापार संघका अध्यक्ष अशोककुमार श्रेष्ठले बताए । नेपालीहरुको महान् चाडबाडको समयमा सामान आपूर्ति नहुँदा व्यापारीमात्र नभएर उपभोक्ता पनि त्यसको मारमा परेका थिए । अब नाका खुलेसँगै सबैलाई राहात पुगेको श्रेष्ठको भनाइ छ ।
 
सामान्य समयमा भन्दा चाडबाडको समयमा किराना, फेन्सी तथा खाद्य पदार्थको माग बजारमा बढी हुन्छ । तर, महिनौँसम्म नाका ठप्प हुँदा आपूर्तिमा समस्या भएर बजारको मागअनुसार सामान पुर्याउन व्यापारीलाई पनि समस्या भएको थियो । चीनसँग जोडिएका दुवै नाका सञ्चालनमा आएसँगै सामान आपूर्तिमा सहज भएको अध्यक्ष श्रेष्ठको भनाइ छ । 

“बजारमा अन्य समयमभन्दा दसैँ, तिहार जस्ता चाडबाडको समयमा किराना तथा फेन्सी सामग्रीको माग धेरै हुन्छ” उनले भने, “नाका बन्दको कारण उपभोक्ताको मागअनुसार सामान आपूर्ति गर्न गाह्रो अवस्था थियो । तर , दुवै पक्षको सरकारबीचमा सहमति भएर नाका खुला हुँदा व्यापारीहरुलाई ठूलो राहत पुगेको छ ।”

अब निरन्तरण रुपमा नाका सञ्चालनमा आएपछि उपभोक्ताको मागसमेत पूरा गर्न सहज हुने श्रेष्ठले बताए ।

“रसुवागढी नाकाबाट दुई दिनमा २८ वटा कन्टेनर नेपाल भित्रिएको छ । यता तातोपानी नाकाबाट कन्टेनर आइरहेका छन्,” उनले भने, “आपूर्ति सहज हुँदा सामान आयातमा सहज हुन्छ । त्यसले गर्दा बजारको माग पूरा गर्न सहज हुन्छ ।”

तातोपानी नाका साउन २५ गतेदेखि बन्द भएको थियो । उक्त नाका बन्द भएको एक महिनापछि भदौ २५ गतेदेखि सञ्चालनमा आएको भन्सार कार्यालयले जनाएको छ । नाका सञ्चालनमा आएको ६ दिनमा फलफूल तथा खाद्य पदार्थ बोकेको २० वटा गाडी नेपाल भित्रिएका छन् ।

तातोपानी नाकाबाट अहिलेसम्म २० वटा गाडीहरुमा स्याउ, अदुवा, खुद्रा सामान नेपाल भित्रिएको तातोपानी भन्सार कार्यालयका सूचना अधिकारी लक्ष्मण बास्तोलाले बताए । जसमध्ये स्याउ ४ वटा, लसुन ६ वटा, खुद्रा ५ वटा, २ वटा के्रन, एउटा मेसिन, एउटा ऊन, २ वटा रोल कपडा बोकेको गाडी नेपाल भित्रिएका हुन् ।