काठमाडौं । गुण एयरलाइन्सको वित्तीय ‘अडिट’ कमजोर देखिएको छ । पाँचवटा जेट स्ट्रिम विमान बेच्ने तयारी गरेपछि नेपाल नागरिक उड्डयन प्राधिकरणले एयरलाइन्स कम्पनीको वित्तीय अडिट सुरु गरेको थियो ।

प्राधिकरणको वित्तीय अडिटअनुसार गुण एयरलाइन्सले प्राधिकरणलाई चार करोड ५० लाख रुपैयाँ तिर्न बाँकी रहेको छ । यस्तै, कर्मचारीलाई लामो समयदेखि तलबभत्ता नदिएको र बोर्डिङ पास छपाइको भुक्तानी बाँकी रहेको प्राधिकरणले गरेको अडिटमा देखिएको छ ।

यसअघि, प्राधिकरणले पाइलट र कर्मचारीलाई समयमा तलबभत्ता नदिएको भन्दै गुणको सबै उडान रद्द गरिदिएको  थियो । त्यसलगत्तै प्राधिकरणले गुणको वित्तीय अडिट सुरु गरेको थियो ।

गुण एयरलाइन्सले पोखरा, जनकपुर, विराटनगर, भरतपुर, भैरहवा, नेपालगञ्ज, सुर्खेतलगायतका गन्तव्यमा उडान गर्दै आएको थियो । तर, पछिल्लो एक महिनादेखि सबै उडान ग्राउन्डेड गरिएको छ ।

गुणसँग अहिले १८ सिट क्षमताको सातवटा विमान छन् । जसमा यती एयरलाइन्ससँग किनेको पाँचवटा जेट स्ट्रिम विमान र दुईवटा पुरानो सिम्रिक एयरलाइन्ससँग रहेको बिचक्राफ्ट विमान रहेको छ । तीमध्ये अहिले गुणले यतीसँग किनेको पाँचवटा विमान बेच्न लागेको थियो । 

तर, वित्तीय अडिट कमजोर भएकाले उक्त जहाज बिक्री गर्न नपाउने प्राधिकरणका सूचना अधिकारी ज्ञानेन्द्र भुलले बताए । अहिले प्राधिकरणमार्फत वित्तीय अडिट भइरहेको सूचना अधिकारी भुलले जानकारी दिए ।

“अहिले वित्तीय अडिट भइरहेको छ । अहिले उडानमा लगाएको प्रतिबन्द पनि कायम छ,” भुलले भने, “वित्तीय अडिट कमजोर देखिएको छ । वित्तीय सुधार नभएसम्म जहाज बिक्री पनि गर्न पाउँदैन । उडानमा लगाएको रोक कायम रहन्छ ।”

यता, गुण एयरलाइन्सका अध्यक्ष राजेन्द्र शाक्यले भने अहिले अडिट विवरण कम्पनीलाई प्राप्त नभएको बताए । उनले भने, “हामीलाई अहिले अडिट विवरण प्राप्त भएको छैन । विवरण प्राप्त भएपछि हामी त्यहीअनुसार अघि बढ्छौँ ।”

गुण एयरलाइन्सले २०२१ देखि उडान सुरु गरेको थियो । 

पारिवारिक सुनचाँदी व्यवसाय हुँदै घरजग्गाबाट एयरलाइन्स व्यवसायमा प्रवेश गरेका राजेन्द्र शाक्य यसअघि समेत समस्यामा परेका थिए । गुण एयरलाइन्स समस्यामा परेपछि उनको सहकारी तथा अन्य व्यवसायसमेत समस्यामा परेका थिए । गतवर्ष उनले एक अर्ब लगानीमा पुनः गुण एअरलाइन्स नै चलाउने निर्णय गरेका थिए ।