काठमाडौं । प्राज्ञिक विद्यार्थी परिषद् नेपालले ११ हिमाली जिल्लाका विद्यार्थीहरूलाई शैक्षिक सामग्रीहरू वितरण गर्ने भएको छ ।

शुक्रबार काठमाडौंमा पत्रकार सम्मेलनको आयोजना गर्दै प्राज्ञिक विद्यार्थी परिषद्ले कक्षा ११ र १२ मा अध्ययनरत १८ सय १० जना विद्यार्थीहरूलाई ३२ लाख २७ हजार मूल्य बराबरको शैक्षिक सामग्री वितरण गर्न लागेको जानकारी दिएको हाे ।

परिषद्ले शैक्षिक सामग्री वितरणका लागि सिन्धुपाल्चोक, दोलखा, रसुवा, बझाङ, ताप्लेजुङ, मनाङ, मुस्ताङ, गोरखा, मुगु, डोल्पा र हुम्ला जिल्लाका विद्यार्थी छानेको बताएको छ ।

प्राज्ञिक विद्यार्थी परिषद्का राष्ट्रिय संगठन सचिव नारायणप्रसाद ढकालले यो वर्षमात्रै नभएर विगत २७ वर्षदेखि नै परिषद्ले विद्यार्थी लक्षित शैक्षिक सामग्रीहरू वितरण गर्दै आएको जनाए । विद्यार्थीहरू अध्ययन गर्ने मात्र नभएर भविष्यका देशका कर्णधार भएको पनि उनको भनाइ थियो । उनले परिषद्ले हरेक वर्ष कुनै न कुनै सामाजिक कार्य गर्दै आएको जानकारी दिए ।