काठमाडौं । धादिङको बन्चरेडाँडाका स्थानीयको अवरोध गए रातिदेखि हटेसँगै फोहोर बोकेका गाडीहरू विसर्जनस्थलमा पुगेका छन् ।

शनिबार बेलुका बाटोमै फोहोर फाल्ने गाडीविरुद्ध स्थानीयले अवरोध गरेका थिए । स्यानिटरी ल्यान्डफिल साइट बन्चरेडाँडाका सहायक इन्जिनियर सरकारदीप श्रेष्ठले फोहोरका गाडी विसर्जनस्थलमा पुगेको जानकारी दिए ।

“गए राति फोहोर बोकेर गएका केही गाडीले बाटोमै फोहोर खसालेका थिए । सो गाडीविरुद्ध स्थानीयले फोहोरमा अवरोध गरेका थिए । अहिले खुल्यो,” उनले भने ।

प्रहरीको सुरक्षामा शनिबार फोहोर बोकेका १५२ गाडी विसर्जनस्थलमा पुर्‍याइएको थियो । आज कति फोहोरका गाडीहरू विसर्जनस्थलमा पुगे भन्ने विवरण बेलुका आउने उनले बताए ।

काठमाडौं महानगरपालिकाका अनुसार लामो समयदेखि उपत्यकामा थुप्रिएको फोहोर उठाउन कम्तीमा दुई साता लाग्नेछ ।