काठमाडौं । स्रोत नखुलेको नगद ६८ लाख रुपैयाँसहित चारजनालाई मंगलबार (हिजो) राति प्रहरीले पक्राउ गरेको छ । काठमाडौं महानगरपालिका–९, सिनामंगल शम्भुमार्गस्थित सडकबाट उनीहरूलाई पक्राउ गरिएको प्रहरी प्रधान कार्यालयले जानकारी गराएको छ ।

पक्राउ पर्नेमा काठमाडौं महानगरपालिका–३२, दोभानपुलका ४६ वर्षीय राजकुमार माली, काठमाडौं–१०, नयाँ बानेश्वरका १८ वर्षीय एक किशोर, काठमाडौं–७, शान्तिगोरेटोमा बस्दै आएका झापाको अर्जुनधारा नगरपालिका–७ का ३२ वर्षीय प्रवेशकुमार पौडेल र झापाकै बिर्तामोड नगरपालिका–५ का २७ वर्षीय युवराज सुवेदी छन् ।

प्रदेश ३–०१–०२२ च १९७२ नम्बरको कारमा सवार उनीहरूलाई उक्त स्रोत नखुलेको नगदसहित फेला पारी पक्राउ गरिएको प्रहरीले जनाएको छ ।

६ लाखसहित पक्राउ
उता, स्रोत नखुलेको नगद ६ लाख रुपैयाँसहित प्रहरीले रुपन्देहीको सिद्धार्थनगर नगरपालिका–१, नौडिहवाबाट भारतको महराजगन्ज, सुनौलीका ४८ वर्षीय डिम्पल भनिने अंगदकुमार गुप्तालाई पक्राउ गरेको छ ।

मंगलबार दिउँसो लु८८प ५१६० नम्बरको मोटरसाइकलमा सवार उनलाई उक्त स्रोत नखुलेको नगदसहित पक्राउ गरिएको प्रहरीले जनाएको छ ।