मुम्बई । बलिउडका दिग्गज अभिनेता मिथुन चक्रवर्तीलाई नचिन्ने चलचित्रजगत्मा कमै होलान् । उनको ‘डिस्को डान्स’को फ्यान धेरै छन् ।

उनले सन् १९७६ मा चलचित्र ‘मृग्या’बाट बलिउडमा डेब्यु गरेका थिए । पहिलो चलचित्रबाटै उत्कृष्ट अभिनेताको राष्ट्रिय अवार्ड जिते ।

तर, सफल सुरुवात गरेका मिथुनको फिल्मीयात्रा सहज पक्कै थिएन । उनको करियरमा यति धेरै उतारचढाव आयो कि मिथुनले आत्महत्या गर्नेसम्मको मनस्थिति बनाएका थिए ।

८० र ९० को दशकमा लाखौँ व्यक्तिको मनमुटुमा ‘राज’ गरेका मिथुनले व्यक्तिगत र व्यावसायिक जीवनमा थुप्रै उतारचढाव देखेका छन् । आफ्ना असहज दिनहरू सम्झँदै उनी भन्छन्, “सामान्यतया म यो विषयमा कुरा गर्दिनँ र त्यस्तो कुनै विशेष चरण छैन, जसको बारेमा म कुरा गर्न चाहन्छु । संघर्षको दिनका कुरा नगर्दा राम्रो हुन्छ । किनभने, नयाँ अभिनेता–अभिनेत्रीहरू हतोत्साहित हुनसक्छन् । जो कोही पनि संघर्षको समयबाट गुज्रन्छन् । तर, मेरो संघर्ष धेरै छ ।”

संघर्षका दिनबारे कुरा नगर्ने भन्दाभन्दै उनले आफूले हार खाएका दिनहरू सम्झँदै भने, “कहिलेकाहीँ मलाई लाग्थ्यो कि म आफ्नो लक्ष्य हासिल गर्न सक्दिनँ । मैले आत्महत्या गर्नेसम्मको सोच बनाएको थिएँ । केही कारणले गर्दा म कोलकाता फर्किन पाइनँ । तर, मेरो एउटा सुझाव– बिनालडाइँ आफ्नो जीवन समाप्त गर्नेबारे नसोच्नोस् । म जन्मजात फाइटर हुँ । मलाई कसरी हार्ने भनेर थाहा छैन । आज हेर्नोस्, म कहाँ छु ।”

पछिल्लो चलचित्र ‘द ताशकन्द फाइल्स’ र ‘द कश्मीर फाइल्स’मा उनको अभिनयको खुब तारिफ भयो । उनले थुप्रै बंगाली चलचित्रमा पनि अभिनय गरेका छन् । पाँच दशक लामो करियरमा ३७० भन्दा धेरै चलचित्रमा अभिनय गरेका छन् ।

यद्यपि, मिथुन अहिले पनि छायांकनका बेला नर्भस हुने गरेको बताउँछन् । हरेकपटक छायांकनको पहिलो दिन आफू नर्भस हुने गरेको उनको भनाइ छ । नवभारत टाइम्सबाट ।