विराटनगर । प्रदेश–१ को नामको विषयमा छलफल गर्न प्रदेश सभामुखले सर्वदलीय बैठक आह्वान गरेका छन् । सभामुख प्रदीपकुमार भण्डारीले प्रदेशसभाका संसदीय दललाई पत्राचार गरी साउन ६ गते शुक्रबार सर्वदलीय बैठक राखिएको जनाएका छन् । 

बैठकमा नामाकरणको विषयमा छलफल हुने प्रदेशसभा सचिवालयका सचिव गोपालप्रसाद पराजुलीले जानकारी दिएका छन् । दलहरुबीच साझा सहमति गराउने प्रयास स्वरुप छलफल आह्वान गरिएको जनाइएको छ ।
 
नामको विषयमा दलहरुबीच एकमत छैन । भौगोलिक र जातीय पहिचानको विषयमा राजनीतिक दलले आ–आफ्नो अडान राखेका कारण प्रदेश–१ को नामको टुंगो लाग्न सकेको छैन । सहमति नभए सरकार प्रकृयामा लगेर नामबारे छलफल गराउने तयारीमा छ ।

यसैबीच, बजेट पारित गरेपछि स्थगित भएको प्रदेशसभाको बैठक साउन ८ गते बस्ने भएको छ ।