झापा । झापाको मेचीनगर नगरपालिका–८ पूर्व–पश्चिम लोकमार्गस्थित जोरसिमल चेक प्वाइन्टबाट शनिबार सशस्त्र प्रहरीले ५ लाख २१ हजार भारतीय रुपैयाँसहित पाँच जनालाई पक्राउ गरेको छ ।

पक्राउ पर्नेहरूमा भारतमा घर बताउने आनन्द कुमार सदेका, प्रमोद जलान, मनोज अग्रवाल, अशोक अग्रवाल र दार्जिलिङ घर बताउने चालक अविजित सिंह छन् ।

भारतबाट नेपालतर्फ आउँदै गरेको डब्ल्यू.बी. ७४ बी.एच. १६४३ नम्बरको टोयटा कारलाई शंका लागि चेकजाँच गर्दा दुई हजार दरको १०१ वटा र पाँच सय दरको ६३८ वटा भारतीय नोट फेला पारिएको हो । सशस्त्र प्रहरीले उक्त कार समेत बरामद गरेको छ ।

पक्राउ परेकाहरूलाई बरामद रुपैयाँ तथा कारसहित आवश्यक कारबाहीको लागि राजस्व अनुसन्धान कार्यालय ईटहरीमा बुझाइएको छ ।