वासिङटन । बढ्दो महँगीले आक्रान्त अमेरिकी नागरिक हिजोआज घरमै खाना पकाउन, परिवारसँग रमाउन र बेलाबखत आफन्त तथा साथीभाइकामा पाहुना लाग्न थालेका छन् । उनीहरूले सवारीसाधन हुँइक्याएर टाढाटाढासम्मको यात्रालाई पनि अहिले थाती राखेका छन् ।

घरमै पर्याप्त मात्रामा खानेकुरा पकायो, सम्भव भएसम्म रेस्टुराँ नगयो, घरै बस्यो । छोटो दूरीमा मात्र यात्रा गर्‍यो । खर्च जोगाउन यस्तै दैनिकी बनेको छ, अमेरिकीको हिजोआज ।

उत्तरी भर्जिनियास्थित एउटा सुपथ मूल्य खुद्रा पसलमा भेटिएका जोन खाद्यवस्तुको चर्को मूल्यवृद्धिका कारण घरमा आफैँ विविध परिकार पकाउन थालेका छन् । आफ्नो पहिलो नाम मात्र बताउन चाहने उनी विरलै रेस्टुराँतिर जान्छन् । सरकारी कर्मचारी उनी एक झोला कुखुराका साँप्रा र १० टुक्रा कुखुराका पखेटाको मूल्य उस्तै भएको बताउँछन् ।

दशकौँपछि अमेरिकामा महँगी अचाक्ली बढेको छ । खर्च जोगाउन धेरै अमेरिकी नागरिकले विविध उपाय अवलम्बन गरेका छन् । अमेरिकी उपभोक्ता मूल्य सूचकांक चार दशकपछि पहिलोपटक गएको जेठमा ९.१ प्रतिशतले बढेको थियो । त्यसयता खाद्य सूचकांक १०.४ प्रतिशतले बढ्दा मध्यमवर्गीय अमेरिकीलाई हातमुखजोर्न धौधौ भएको छ ।

मूल्यवृद्धि नभएका कुनै वस्तु छैनन् । दशौँ लाख अमेरिकी इन्धनको मूल्य बढेपछि थप पिरोलिएका छन् ।

चर्को मूल्य चुकाएर हवाईजहाजबाट यात्रा गर्ने चाहना पनि अब धेरैको रहेन । न्युयोर्क महानगरका सेवा निवृत्त शिक्षिका ग्लोलिया ब्रान्डम्यानले हवाईजहाज नचढेको धेरै भयो । भाडा महँगो भएकाले जहाजको सट्टा मोटरकारमा यात्रा गर्दै आएको बताउने उनले पेट्रोलको बढेको मूल्यले अब त्यसमा पनि यो वर्ष कटौती गर्ने तरखरमा आफू रहेको सुनाइन् । पुरानो कारलाई मर्मत–सम्भार गरेर दौडाइरहेको उनले बताइन् । उच्च मूल्यकै कारण नयाँ कार किन्न नसकेको उनको कथन छ ।

उत्तरी भर्जिनियाका स्थायी बासिन्दा जेम्स पेट्रोलको मूल्यवृद्धिले तनाव बढाएको दुःखेसो गर्छन् । हरेकपटक कारको इन्धन ट्यांक भर्दा उनले थप ३० डलर तिर्नुपर्छ । पाएसम्म र भ्याएसम्म सार्वजनिक यातायात सेवा प्रयोग गर्ने गरेको उनले बताए ।

घरभाडा पनि अनपेक्षित रूपमा बढेको छ । त्यो अहिले १२ देखि २० प्रतिशतले वृद्धि भएको छ । केन्टकीको किराना पसलमा काम गर्ने आफ्नी भतिजी घरभाडा तिर्न नसकेर आफूसँगै बस्न आएकी आर्था फक्स जोन बताउँछिन् ।

बढ्दो आवास भाडाले घरबारविहीनको संख्या बढ्ने चिन्ता पनि अमेरिकामा बढेको छ । देशको अर्थतन्त्रसँग पनि अमेरिकी नागरिक खुसी नभएका अन्तरराष्ट्रिय मुद्रा कोषका एकजना पूर्वअधिकारीले बताएका छन् । रासस/सिन्ह्वा