काठमाडौं । नबिल बैंक लिमिटेड र नेपाल बंगलादेश बैंकबीच भएको प्राप्तिको सम्पूर्ण कार्य समापन भई एकीकृत कारोबार सुरु भएको छ । नबिल बैंकको ३८औं वार्षिकोत्सवको  पूर्वसन्ध्यामा एक कार्यक्रमबीच एकीकृत कारोबार थालनी भएको घोषणा गरिएको हो ।

दुई बैंकको मर्जपछि ‘नबिल बैंक लिमिटेड’ नामबाट एकीकृतरूपमा वित्तीय कारोबार सञ्चालन भएको हो । कार्यक्रममा बोल्दै मुख्य सचिव शंकरदास वैरागीले पुरानोमध्येको एक नेपाल बंगलादेश बैंकको प्राप्तिपछि नबिल बैंक अझ ठूलो भएको  र यस कदमले देशको अर्थतन्त्रमा सकारात्मक प्रभाव पर्ने विश्वास लिएको बताए ।

“नबिल बैंक र एनबी बैंक एक–आपसमा प्राप्ति (एक्विजिसन) को आवश्यकता र औचित्यमाथि छलफलपश्चात् समग्र बैंकिङ प्रणालीको आवश्यकतालाई समेत मध्यनजर गर्दै बैंकप्रति सर्वसाधारणको विश्वसनियतामा थप अभिवृद्धि गर्न कदम चालेका हौँ,” बैंकका प्रमुख कार्यकारी निर्देशक ज्ञानेन्द्र ढुंगानाले भने ।