काठमाडौं । नेपाली कांग्रेसका केन्द्रीय सदस्य प्रकाश स्नेहीले ‘कांग्रेसको भोट बैंक के हो ?’ भन्दै प्रश्न गरेका छन् ।

सानेपामा जारी केन्द्रीय कार्यसमितिको बैठकमा मंगलबार उनले हिन्दुधर्मको विषय लिएर निर्वाचनमा जाने कि नजानेमा पनि छलफल गर्नुपर्नेमा जोड दिए ।

“धर्म नमान्ने कम्युनिस्ट हुने, धर्म मान्ने राप्रापा हुने, कांग्रेको भोट बैंक के हो ?,” उनले भने, “हिन्दुधर्मको विषय लिएर निर्वाचनमा जाने कि नजाने ? छलफल गरौँ ।”

उनले धर्मनिरपेक्षताको विषय पुनरवालोकन गर्न जरुरी रहेको पनि बताए ।

समानुपातिक निर्वाचन प्रणाली खारेज गर्नुपर्ने उनले उल्लेख गरे । “देश अस्थिर भयो,” उनले भने, “गठबन्धनको टेको टेकेर सरकार बनाउनुपर्‍यो ।”

संघीयताका बारेमा बहस चलाउनुपर्ने उनको भनाइ छ । “संघीयता आएको यत्रो वर्ष भयो, संघीयताका बारेमा छलफल र बहस चलाउनुपर्छ,” उनले भने, “तीन करोड जनसंख्यालाई सात प्रदेश छ, प्रदेशका मन्त्रीलाई, नेतालाई यति थोरै अर्थ व्यवस्थाले कसरी धान्ने ?”