काठमाडौं । नवनियुक्त भौतिक पूर्वाधार तथा यातायातमन्त्री मोहम्मद इस्तियाक राईले इम्बोस्ड नम्बर प्लेट र डिजिटल सवारी चालक अनुमति पत्र (स्मार्ट लाइसेन्स) का विषयमा देखिएको समस्या अध्ययन गर्न समिति गठन गरेका छन् ।

सोमबार मन्त्रालयमा पदभार ग्रहण गर्दै मन्त्री राईले इम्बोस्ड नम्बर प्लेटमा अन्यौलता देखिएको र डिजिटल सवारी चालक अनुमति पत्र समयमा नै प्राप्त गर्न नसक्ने अवस्था देखिएको भन्दै अध्ययन गर्न समिति गठन गर्ने निर्णय गरेका हुन् ।

दुईवटै कार्यदललाई प्रतिबेदन बुझाउन १५ दिनको म्याद दिएको र समितिको प्रतिवेदनका आधारमा समस्या समाधानको बाटोमा अघि बढ्ने उनले बताए । पूर्वाधार तयार नपारी इम्बोस्ड नम्बर प्लेट जबर्जस्ती लागु गर्न खोजिएकाले विवाद भएको उनको भनाइ छ । उनले समयमा नै आयोजना पूरा नहुने प्रवृतिलाई अन्त्य गर्ने पनि बताए । 

उनले पूर्वाधार निर्माण आयोजनाको अवस्थाका बारेमा पनि अध्ययन गर्न समिति बनाइएको बताए ।