काठमाडौं । सवारी चालक अनुमति पत्र (लाइसेन्स) को अनलाइन आवेदनमा ओटीपी कोर्ड नआउने समस्या देखिएको छ । सोमबारदेखि सुरू भएको नयाँ आवेदन अनलाइन प्रणालीमा सेवाग्राहीहरूले आवेदन भर्दा यस्तो समस्या देखिएको हो ।

यातायात व्यवस्था विभागका अनुसार नयाँ आवेदन प्रणालीमा युजरनेम र पासवर्ड राख्दा प्रमाणीकरण गर्न ओटीपी कोर्ड आउनुपर्नेमा नआउने समस्या देखिएको छ । विभागले एकैपटक धेरै सेवाग्राहीले आवेदन दिँदा यस्तो समस्या आएको र प्राविधिक टोलीले हेरफेर गरिरहेको नाएको छ ।

अनलाइन आवेदनको पुरानो प्रणालीअनुसार आवेदकले सोझै आवेदन फाराम भर्न पाउने व्यवस्था थियो । अहिलेको नयाँ प्रणालीमा आवेदक आफ्नो व्यक्तिगत विवरणसहित विस्तृत प्रोफाइल बनाउनुपर्ने प्रावधान ल्याएको छ ।

विभागले पुराना आवेदकहरूको चाप घटाउने र आवेदन दिएको १५ दिनमै परीक्षाको पालो आउने नयाँ प्रणाली ल्याइने भन्दै लामो समयदेखि आवेदन बन्द गरेको थियो ।