काठमाडौं । आइतबार बिहान पोखरादेखि जोमसोम उडेको तारा एयरको जहाज १० बजेर १५ मिनेटमा अवतरण गर्नुपर्ने थियो । 

१० बजेर ७ मिनेटसम्म सम्पर्कमै रहेको जहाज एकाएक सम्पर्कविहीन भयो । चालक दलका ३ सदस्यसहित २२ जना सवार जहाज सम्पर्कविहीन भएपछि सुरक्षा निकायले खोजी सुरु गरे ।

खराब मौसमका कारण उडेका हेलिकोप्टरहरुले ‘सर्च’ गर्न सकेनन् । त्यहीबीचमा आइतबार दिउँसो जहाजका पाइटल प्रभाकर घिमिरेको मोबाइल फोन लाग्यो । मोबाइलमा घण्टी बज्यो तर फोन ‘रिसिभ’ भएन ।

प्रहरीका उच्च अधिकारीका अनुसार तीनपटकसम्म पाइलट घिमिरेको मोबाइल नम्बरमा घण्टी गएको थियो । मोबाइल नम्बरमा घण्टी बजेपछि केही आसा पनि पलाएको थियो ।

आइतबार साँझ सेनाले जहाज खोज्न कार्य सोमबार बिहानै सुरु गरिने सूचना जारी ग¥यो । आफन्तको रुवाबासीले पोखरा विमानस्थलमा सन्नाटा छाएको थियो ।

सेना प्रहरीको टोलीले सर्च अपरेसन रोके पनि स्थानीयको एक टोली रातभर जहाजको खोजीमै सक्रिय भयो । दिउँसै जहाज मुस्ताङको थुसाङ गाउँपालिकामा पर्ने मानापाथी हिमाल आसपास हुनसक्ने खबर बाहिर आएको थियो ।

सोही खबर पछ्याउँदै सुमित गौचन नेतृत्वको टोली सो स्थानतर्फ गएको वडा नम्बर २ का वडाध्यक्ष गौतम शेरचन बताउँछन् । उनका अनुसार यार्सा टिप्न जानेहरु पनि सँगसँगै थिए ।

सुमित नेतृत्वको टोलीले सोमबार बिहान ५ बजे तारा एयरको विमान दुर्घटना भएको देखे ।

मुस्ताङ जिल्लाको थुसाङ गाउँपालिका वडा नम्बर २ को सानुसरे भीरमा १४ हजार ५०० फिटको उचाईमा दुर्घटनाग्रस्त अवस्थामा भेटियो ।

वडाध्यक्ष गौतम शेरचनले भने,“दुर्घटनाग्रस्त जहाज देखे पनि सुमितले नै प्रहरी र सीडीओ कार्यालयमा जानकारी गराएका रहेछन् । त्यही सूचनापछि हेलिकोप्टरमा आएको प्रहरी टोली घटनास्थल पुग्यो । सुमितले नै फोटोहरु सार्वजनिक गरेका हुन् ।”

गौचनका अनुसार दुर्घटनास्थल निकै उचाइमा रहेको हिमाली क्षेत्र हो । त्यहाँ मानवबस्ती छैन । अहिले पनि केही मात्रामा हिउँ परिरहेको छ ।

वडाध्यक्ष गौचनले भने,“जहाज पड्किएको आवाज गाउँलेले सुनेका हुन् । तर कहाँ कसरी ठोक्कियो कसैले देखेनन् । सजिलै जोकोही त्यो क्षेत्रमा पुग्नै सक्दैन ।”