काठमाडौं । स्थानीय तह निर्वाचनअन्तर्गत सर्लाहीको धनकौल गाउँपालिकामा नेपाली सेना परिचालन गरेर मतदान पुनः सुरु गरिएको छ । सहायक प्रमुख जिल्ला अधिकारी हरिप्रसाद अधिकारीका अनुसार आज दिउँसो ३ बजेबाट मतदानकार्य पुनः सञ्चालन गरिएको हो ।

धनकौल गाउँपालिका–२ स्थित पशु सेवा केन्द्र मतदानस्थलमा विवाद हुँदा चार घण्टाभन्दा बढी मतदानकार्य स्थगित गरिएको थियो । अहिले थप सुरक्षा बल प्रयोग गरेर मतदान भइरहेको उनले जानकारी दिए ।

आज बिहान मतदान सुरु भएको केही बेरमै झडप भएको थियो । नेकपा (एमाले), नेपाली कांग्रेस र नेकपा (माओवादी केन्द्र)का कार्यकर्ताबीच बुथ राख्ने विषयमा झडप भएको थियो ।

“मतदान स्थगन हुँदै बीचमा केही बेर फेरि मतदान हुँदै पुनः स्थगन भएको थियो । विवादका कारण सुरक्षा शक्ति थप गरेर हामीले मतदानकार्य सुचारु गरेका छौँ,” उनले भने, “बेलुका ५ बजेसम्म मतदानस्थलभित्र प्रवेश गर्ने मतदाताहरूले मतादन गर्न पाउनुहुुनेछ ।”