काठमाडौं । सत्तारूढ दलनिकटका पत्रकारका संगठनलाई निर्वाचन आयोगले स्पष्टीकरण सोधेको छ । सत्ता गठबन्धनलाई ‘भोट हाल्नुस्’ भन्दै विज्ञप्ति जारी गर्ने संगठनहरूलाई आयोगले आज विज्ञप्ति जारी गरी २४ घण्टाभित्र स्पष्टीकरण दिन भनेको हो ।

“पत्रकारका पेसागत संगठनको तर्फबाट हस्ताक्षरकर्ताहरूले विज्ञप्ति जारी गर्नु निर्वाचन आचारसंहिताविपरीत हुन्छ/हुँदैन ? पत्रकारको पेसागत संगठन अमुक गठबन्धनका पक्षमा उभिने विषयले प्रेस स्वतन्त्रता कुण्ठित हुन्छ/हुँदैन ?,” आयोगले स्पष्टीकरणपत्रमा भनेको छ, “पत्रकारिताको क्षेत्र र राजनीतिक क्षेत्र भिन्न हो/होइन ? कुनै पनि सञ्चार प्रतिष्ठानसम्बद्ध कर्मचारी र पत्रकारले पेसागत संघ/संगठनमा आबद्ध भई सोमार्फत निर्वाचन आचारसंहिताविपरीत वक्तव्य जारी गर्दा आचारसंहिता उल्लंघन हुँदैन भन्ने दलिल पेस गर्न मिल्छ/मिल्दैन ?”

आयोगले पत्र प्राप्त भएको समयले २४ घण्टाभित्र उक्त विज्ञप्ति हटाई सोही समयभित्र आयोगमा प्राप्त हुने गरी लिखित जवाफसहितको स्पष्टीकरण पेस गर्न निर्देशन दिएको छ ।