मस्को । स्विडेन र फिनल्यान्ड नेटोमा सहभागी भए रुसले बाल्टिक समुद्री क्षेत्रमा परमाणु हमला गर्ने चेतावनी दिएको छ । बाल्टिक समुद्रलाई डेनमार्क, एस्टोनिया, फिनल्यान्ड, जर्मनी, लटिभा, लिथुआनिया, रुस, स्विडेन र उत्तर र केन्द्रीय युरोपियन प्लेनले घेरेका छन् । 

रुसको सुरक्षा परिषद्का प्रमुख डिमिट्रि मेडभेडेभले भने, “यदि त्यसो भएमा बाल्टिक परमाणुमुक्त स्थितिमा रहन सक्दैन । त्यहाँ सन्तुलन पुनःस्थापना गर्नैपर्ने हुन्छ । यस भन्दा अगाडिसम्म रुसले त्यस्तो तरिका अपनाएको थिएन र यस्तो सोच पनि राखेको थिएन ।”

स्विडेन र फिनल्यान्डले नेटोको सदस्यता लिने तयारी गरेपछि रुस झस्किएको छ । युक्रेनमा रुसको हमलापछि अधिकतम स्केन्डेभियन राष्ट्रहरूमा नेटोको सदस्यता पाउनेसम्बन्धी जनधारणा ठुलो रूपमा बदलिएको छ । 

यस्तोमा फिनल्यान्डले अब केही हप्तामै यससम्बन्धी प्रक्रिया थाल्नसक्ने प्रधानमन्त्री सना मरिनले बताएकी छन् ।

रुसको चेतावनीपछि लिथुआनियाका रक्षामन्त्रीले बाल्टिक क्षेत्रमा रुससँग पहिले नै आणविक हतियार भएको र उनीहरूले केबल सार्वजनिक रूपमा स्वीकार मात्र नगरेको आरोप लगाएका छन् । बाल्टिक समुद्र नजिक नेटोका दुई सदस्य पोल्यान्ड र लिथुआनिया पनि पर्दछन् ।