लन्डन । क्रेमलिनका प्रवक्ता दिमित्री पेस्कोभले यदि फिनल्यान्ड र स्विडेन उत्तर एटलान्टिक सन्धि संगठन (नेटो) प्रवेश गरेको खण्डमा रुसले आफ्नै तरिकाले ‘परिस्थितीलाई पुनः सन्तुलन’ गर्नुपर्ने अवस्था आउने बताएका छन् । मस्कोले युक्रेनलाई नेटोमा प्रवेश नगराउन नै आक्रमण गरेको हो । त्यसैले फिनल्यान्ड र स्विडेनले अमेरिकी नेतृत्वमा रहेको नेटोमा प्रवेश गर्नुअघि सोच्नु पर्ने भएको छ । 

पेस्कोभले वेलायतको स्काई न्युजलाई भनेका छन्, “यदि यी दुई मुलुक नेटोमा प्रवेश गरेको खण्डमा हामीले आफ्नो सुरक्षा सुनिश्चितताका लागि पश्चिमी सिमाना थप सुदृढ बनाउनु पर्ने हुन्छ । हुन त रुसले यस्तो कदमलाई आणविक हतियार नै प्रयोग गर्नुपर्ने किसिमले अस्तित्वकै लागि खतराको रुपमा हेर्दैन ।” 

गत २४ फेब्रुअरीमा रुसले युक्रेनमा आक्रमण गरे यता हजारौं सर्वसाधारण र सेनाको ज्यान जानुका साथै थुप्रै सहर र बस्तीहरु ध्वस्त भइसकेका छन् । 

फिनल्यान्ड र स्विडेनलाई स्वागत छ  नेटो प्रमुख 
नेटोका महासचिव जेन्स स्टोल्टेनवर्गले यदि फिनल्यान्ड र स्विडेनले आफ्नो सैनिक गठबन्धनमा आवद्ध हुन आवेदन दिएका खण्डमा तिनीहरुलाई तत्कालै अंगालो मारेर स्वागत गरिने बताएका छन् । अहिले रुसले युक्रेनमाथि आक्रमण गरिरहेको देखेर फिनल्यान्ड र स्विडेनका जनताले नेटोको सदस्यता लिन समर्थन गरेका छन् । 

गत महिना फिनिस प्रशारणकर्ता वाइएलइले गरेको सर्भेक्षणले ५० प्रतिशतभन्दा बढी फिनिस जनता नेटो प्रवेशको समर्थनमा रहेको देखाएको छ । छिमेकी मुलुक स्विडेनको जनमत पनि त्यतिकै सकारात्मक रहेको सर्भेक्षणले जनाएको छ । युक्रेनमा आक्रमण गर्नु अघि रुसी राष्ट्रपति भ्लादिमिर पुटिनले ३० सदस्यीय सैनिक संस्था नेटोलाई सैनिक विस्तार नगर्न र रुसको सीमा क्षेत्रहरुबाट फौज फिर्ता लग्न आह्वान गरेका थिए ।