विराटनगर । सेयर बजारका जानकारहरूले कम्पनीबारे अध्ययन गरेर मात्र लगानी गर्न सुझाव दिएका छन् । विराटनगरमा आज आयोजित धितोपत्र बजारसम्बन्धी लगानीकर्ता शिक्षा तथा सचेतना कार्यक्रममा सेयर बजारका विज्ञहरूले लगानीको प्रक्रिया, लगानी गर्ने कम्पनी र त्यसबारे जानकार हुनुपर्ने सुझाव दिएका हुन् ।

नेपाल धितोपत्र बोर्ड, मर्चेन्ट बैंकर एसोसिएसन अफ नेपाल र स्टक ब्रोकर एसोसिएसन नेपालको संयुक्त आयोजनामा भएको सचेतना कार्यक्रममा धितोपत्र बजारका आधारभूत पक्षदेखि सीडीएसले गर्ने काम, क्रेडिट रेटिङको प्रक्रिया र मर्चेन्ट बैंकिङको विषयमा आधारभुत जानकारी दिइएको थियो ।

धितोपत्र बजारका आधारभूत पक्षबारे नेपाल धितोपत्र बोर्डका निर्देशक दीपेश ताम्राकारले प्रस्तुति दिए । उनले बोर्डले काम गर्ने विधि, प्राथमिक र दोस्रो बजारको विषयमा जानकारी गराएका थिए ।

उनले भने, “सेयर बजार ठूलो क्षेत्र हो । के केमा कसरी लगानी गर्ने भन्नेमा लगानीकर्ता आफैँ स्पष्ट हुनुपर्छ । लगानी गर्दा आफू पनि जानकार हुनुपर्छ हल्लाको पछि लाग्नुभन्दा पनि कम्पनीको आधारभूत पक्षमा अध्ययन गर्नुपर्छ ।”

उनले लगानी क्षेत्रमा आउने नयाँ युवा पुस्ताले अध्ययन गर्नुपर्नेमा जोड दिए । 

नेपाल स्टक एक्सचेन्जतर्फबाट सुरेश जोशीले एक्सचेन्जको स्थापना र यसले गर्ने कामको विषयमा जानकारी गराए ।

क्रेडिट रेटिङ सम्बन्धी जानकारी दिँदै इक्रा नेपालका उज्वल श्रेष्ठले कम्पनीको सबै पक्षको अवस्था बुझेर इक्राले तथ्यांक सार्वजनिक गर्ने गरेको सुनाए ।  

नेपालका सीडीएस एन्ड क्लियरिङ लिमिटेडका पराग बिष्टले सीडीएसले काम गर्ने प्रक्रियाबारे जानकारी गराए । उनले आईपीओ जारी हुने प्रक्रियादेखि लगानीकर्ताको खातामा सेयर आउने विधिको विषया सहभागीले उठाएका जिज्ञासाको जवाफ दिए ।

स्टक ब्रोकर एसोसिएसनका पूर्वअध्यक्ष तथा क्रिस्टल कञ्चनजंघा सेक्युरिटिजका सीईओ प्रियराज रेग्मीले अहिले सेयर बजारमा सर्वसाधारणको पहुँच र आकर्षण निकै बढेको बताए । “सेयर बजार पहिले सानो संख्याका लगानीकर्ताको मात्र आकर्षण रहेकोमा अहिले सर्वसाधारणको पहुँचसमेत निक्कै बढेको छ,” उनले भने ।

कार्यक्रमका सहभागी लगानीकर्ता तथा सर्वसाधारणले कोरोना महामारीपछि प्रदेश नम्बर १ मा डिस्प्ले रोकिँदा समस्या भएको गुनासो गरेका थिए । यसलाई खोल्न पहल गर्नुपर्ने, टीएमएस बिग्रिरहँदा हुने समस्या हल गर्नुपर्ने, नेप्सेको वेबसाइटमा बारम्बार आउने समस्या हटाइनुपर्ने माग गरेका थिए ।

कार्यक्रममा सहभागी नेप्सेका अधिकारीले नयाँ वेबसाइट आएसँगै विस्तारै समस्या हल हुँदै गएको बताए । नयाँबाट राम्रो चल्दै जाने र ट्रेडिङसम्बन्धी वेबसाइटको समस्या पनि समाधान हुने उनीहरूले बताए ।

कार्यक्रममा क्रिस्टल कञ्चनजंघा सेक्युरिटीजकी किशु घिमिरेले स्वागत मन्तव्य राखेकी थिइन् ।