काठमाडौं । लोकतान्त्रिक समाजवादी पार्टी (लोसपा)का केन्द्रीय कार्यकारिणी सदस्य केशव झाले पार्टीसँग चुनावी तालमेलका लागि तीन विकल्प भएको बताएका छन् ।

बुधबार सामुदायिक रेडियो प्रसारक संघ (अकोरब)ले नेपालगन्जमा आयोजना गरेको कार्यक्रममा उनले स्थानीय तहमा चुनावी गठबन्धनको आवश्यकता नभएको बताए । सत्ता गठबन्धनले मुलुकमा राजनीतिक अस्थिरता निम्त्याएको भन्दै चुनावी गठबन्धन गर्नुअघि लोसपाले तीन विकल्पमा छलफल गर्ने उल्लेख गरे ।

“पहिलो विकल्प भनेको लोसपा चुनावमा एक्लै भाग लिने हो । दोस्रो एमालेसँग तालमेल र तेस्रो सत्ता गठबन्धनले हाम्रा राजनीतिक माग–मुद्दा पूरा गरे उसैसँग गठबन्धन गर्ने हो,” उनले भने, “चुनावी गठबन्धनबारे एमालेसँग हाम्रो औपचारिक/अनौपचारिक कुनै संवाद आजसम्म भएको छैन । तर, सरकारसँग चाहिँ हाम्रो दुई–तीन राउन्ड छलफल भएको छ ।”

नेता झाले निर्धारित समयमै स्थानीय तह निर्वाचन हुनेमा अझै आशंकाहरू देखिएको पनि बताए । अहिलेको निर्वाचन एकदमै खर्चिलो भएको भन्दै निर्वाचन आयोगले प्रक्रिया परिवर्तन गर्नुपर्ने धारणा राखे ।

“निर्वाचन एकदमै खर्चिलो भयो । यसलाई मध्यनजर गरेर निर्वाचन आयोगले या त चुनावी प्याटर्न चेन्ज गर्नुपर्‍यो या त चुनावी खर्च तोकेको भन्दा बढी खर्च गर्नेलाई कारबाही गर्न सक्नुपर्‍यो,” उनले भने ।

लोसपाले स्थानीय निर्वाचनलक्षित प्रदेशस्तरीय प्रशिक्षण कार्यक्रम सञ्चालन गरिरहेको उनले जानकारी दिए ।