काठमाडौं । सत्तासाझेदार दल नेकपा (एकीकृत समाजवादी)मा पार्टीका सातै प्रदेश कमिटीको गतिविधिको अवस्था बुझ्न केन्द्रीय नेताहरूको नेतृत्वमा अनुगमन टोली गठन गरिएको छ ।

बिहीबार काठमाडौंमा बसेको एकीकृत समाजवादीको सचिवालय बैठकले पार्टीको गतिविधिलाई प्रभावकारी बनाउनका लागि सातै प्रदेश कमिटीको गतिविधिको अनुगमन गर्ने निर्णय गर्दै अनुगमनका लागि केन्द्रीय नेताहरूको नेतृत्वमा टोली गठन गरिएको हो ।

जसअनुसार प्रदेश नम्बर-१ मा उपाध्यक्ष प्रमेश हमाल, मधेस प्रदेशमा उपमहासचिव जगन्नाथ खतिवडा, वाग्मती प्रदेशमा उपमहासचिव गंगालाल तुलाधर, गण्डकी प्रदेशमा उपाध्यक्ष जयन्ती राई, लुम्बिनी प्रदेशमा उपमहासचिव विजय पौडेल, कर्णाली प्रदेशमा महासचिव बेदुराम भुसाल र सुदूरपश्चिम प्रदेशमा सचिवालय सदस्य रामचन्द्र झाको नेतत्वमा अनुगमन टोली बनाइएको छ ।

बैठकले स्थानीय तह निर्वाचनका लागि 'जनतामा जाऊँ एकीकृत समाजवादीलाई जिताऔँ' भन्ने नारा तय गरिएको उपमहासचिव जगन्नाथ खतिवडाले जानकारी दिए । आउँदो निर्वाचनमा तालमेलका लागि पार्टी खुला रहेको पनि उनले बताए ।

बैठकमा सत्ता गठबन्धनलगायत विषयमा पनि छलफल भएको उनले बताए । संगठन निर्माणको अभियानलाई निर्वाचन प्रचारको अभियानसँग जोड्ने उनले जानकारी दिए ।