वासिङटन । अमेरिकाले रुसमाथि लगाइएका प्रतिबन्ध सहज हुनेगरी सहयोग नगर्न चीनलाई आग्रह गरेको छ । यदि रुसलाई प्रतिबन्धहरू सामना गर्न सहज हुनेगरी सहयोग गरेमा त्यसको परिणाम भोग्नुपर्ने चेतावनी अमेरिकाले दिएको छ ।

नाम नखुलाइएका अमेरिकी अधिकारीहरूले थुप्रै न्युज आउटलेटलाई रुसले आक्रमण सुरु गरिसकेपछि चीनसँग सैनिक सहयोग मागेको बताएका छन् ।

तर चिनियाँ विदेश मन्त्रालयले अमेरिकाले गलत सूचना फैलाइरहेको अरोप लगाएको छ । साथै रुसले बेइजिङसँग सैनिक सहयोग मागेको पनि अस्वीकार गरेको छ । इटालीको रोममा अमेरिकी र चिनियाँ वरिष्ठ अधिकारीहरूको भेटघाटको क्रममा यस्तो आरोप र प्रत्यारोप भएको बताइएको छ । 

वासिङटनका अधिकारीहरूलाई उद्धृत गर्दै अमेरिकी सञ्चार माध्यमहरूले पछिल्ला दिनहरूमा रुसले चीनसँग ड्रोन लगायतका विभिन्न सैनिक उपकरणहरूका लागि अनुरोध गरिरहेको जनाएका छन् । 

सीएनएनलाई अन्तर्वार्ता दिने क्रममा अमेरिकी राष्ट्रिय सुरक्षा सल्लाहकार जेक सुल्लिभानले भनेका छन्, "हामीहरूले चीनसँग प्रत्यक्ष रूपमा रुसलाई लगाइएको प्रतिबन्धलाई सहज हुने खालका कुनै पनि सहयोग नर्गन अनुरोध गरिरहेका छौँ । हामीले विश्वका कुनै पनि मुलुकलाई रुसलाई यसरी सहयोग गर्ने अनुमति दिने छैनौं । रुसी राष्ट्रपति भ्लादिमिर पुटिनले आक्रमण अघि केही योजना बनाइरहेकोबारे चीनलाई जानकारी रहेको अमेरिकालाई विश्वास छ । तर बेइजिङले सो योजनाको विस्तृत विवरण थाहा नपाएको पनि हुन सक्छ । पुटिनले युरोपेली र अन्यलाई जस्तै चिनियाँहरूसँग पनि झुठो बोलेको हुनसक्छ ।"

रुसको युक्रेनमाथिको सैनिक कारबाही अहिले तेस्रो सातामा रहेको छ भने लाखौँ युक्रेनीले देश छाडिसकेका छन् ।

यसबारे बेइजिङस्थित विदेश मन्त्रालयका प्रवक्ता झाओ लिजियानले अमेरिकाले खराब नियत राखेरै युक्रेनी मामिलामा चीनकाबारे दुष्प्रचार गरिरहेको तथा बरु चीनले रुस र युक्रेनबीचको वार्ताका लागि सकारात्मक भूमिका खेलिरहेको बताएका छन् ।  

बीबीसीबाट ।