काठमाडौं । सत्तारूढ नेपाली कांग्रेसको भ्रातृ संस्था नेपाल विद्यार्थी संघको तदर्थ समिति गठन गर्ने तयारी भइरहेको छ । केन्द्रीय पार्टी कार्यालय सानेपामा सभापति शेरबहादुर देउवाबाहेकका पदाधिकारीहरू बसेर संघको विधानलाई पूर्णता दिने कार्य गरिरहेका छन् । 

फागुन ३ गते सम्पन्न पार्टीको केन्द्रीय कार्यसम्पादन समितिले राजीव ढुंगानाको नेतृत्वतमा रहेको संघको वर्तमान तदर्थ समितिलाई भंग गर्दै नयाँ तदर्थ समिति गठन गर्ने निर्णय गरेको थियो । ०७६ सालमा ढुंगानाको नेतृत्वको तदर्थ समिति बनाउँदा संघको अधिवेशन ६ महिनाभित्र गर्न भनिएको थियो । तर, दुई वर्ष सम्म ढुंगानाको समितिले अधिवेशन गराउन नसक्दा समितिलाई भंग गरेर पुनः नयाँ तदर्थ समितिले ल्याउने तयारीमा कांग्रेसले गरेको छ । 

३ फागुनमा सम्पन्न भएको कार्यसम्पादन समितिले नेविसंघको नेतृत्व ३२ वर्ष मुनिको ल्याउन भनेको छ । अहिले कांग्रेसमा नेतृत्व ३२ वर्ष मुनिको ल्याउने कि माथिको ल्याउने भन्नेमा मतभेद छ । एक पदाधिकारी यो तदर्थ समितिमा सबैलाई अटाउने गरी ३२ वर्ष माथिको नेतृत्व ल्याउने तयारी भइरहेको बताउँछन् ।

“चुनावको मुखमा सबैलाई समेटेर समिति ल्याउनुपर्छ । यो सबै समेट्ने अवसर पनि हो,” ती पदाधिकारी भन्छन् । 

तर, पार्टी महामन्त्री गगन थापा भने विधानअनुसार नेतृत्व ल्याउने तयारीमा आफूहरू रहेको बताउँछन् । 

“विधानसम्मत तदर्थ समितिले ल्याउने गृहकार्य हो । संस्थामा थिति बसाउनुपर्छ भन्नेमा हामी जोड दिइरहेका छौँ,” महामन्त्री गगन थापाले भने ।

यस्तै सहमहामन्त्री भीष्मराज आङ्देम्बे पनि ३२ वर्ष मुनिकै पदाधिकारी ल्याउने तर्क गर्छन् । 

यी हुन् आंकाक्षी
नेतृत्वले ३२ मुनि वा माथि कस्तो समिति ल्याउने भन्ने यकिन गर्न सकेको छैन । ३२ मुनि या माथि जताबाट नेतृत्व आए पनि आकांक्षीहरूको लहर लामै छ । ३२ माथिको आए नैनसिंह महरको कार्यसमितिमा रहेका सबै पदाधिकारीहरू दाबेदार हुने निश्चित छ । 

तदर्थ समितिमा संस्थापन र इतर समूहबाट विद्यार्थी नेताहरूले तयारी गरिरहेका छन् ।

संस्थापन समूहबाट प्रेमराज जोशी, डुजाङ शेर्पा, नारायण पाण्डे, मनिष थापा, प्रेम शाही, सुमन केसीलगायत विद्यार्थी नेताहरूको नाम चर्चामा छ ।

कृष्णप्रसाद सिटौला निकट सुशील भट्ट पनि अध्यक्षको लाइनमा उभिएका छन् । ३२ मुनिको समिति आए शेर्पा नेविसंघको अध्यक्ष बन्न निश्चित भएको देउवा निकट नेताहरू मात्र होइन संस्थापन इतर समूह पनि बताउँछ ।

यस्तै संस्थापनइतर समूहबाट अध्यक्षमा सागर परियार, शिव रिमाललगायतका विद्यार्थी नेताहरू लाइनमा छन् । यस्तै, आरआर क्याम्पस इकाइ सभापति सञ्जिव ढकाल पनि सभापतिको दौडमा होमिएका छन् ।

एक पदाधिकारी संस्थापन इतर समूहबाट अध्यक्ष आउने सम्भावना देख्दैनन् । “शेरबहादुर देउवा समूहबाहेकले अध्यक्ष पाउँदैन,” उनी भन्छन् । 

नेविसंघको नेतृत्वमा छात्रा ल्याउनुपर्ने माग पनि उठेको छ । महिला नेतृहरू आफूहरूलाई नेतृत्व दिन पार्टी पदाधिकारीहरूलाई ध्यानाकर्षण गराइरहेका छन् । पूर्व केन्द्रीय सदस्यहरू गीता गुरुङ, पुनम भट्टलगायत रहेका छन् । 

यता, महामन्त्री पदमा पनि आकांक्षा राख्नेहरू पनि खुल्न थालेका छन् । संस्थापन इतर समूहबाट ताराबहादुर थापा महामन्त्रीको दौडमा लागेका छन् । थापा सुशील कोइराला सोसलिस्ट युथ सर्कलका अध्यक्ष हुन् । उनी पूर्वमहामन्त्री शशांक कोइरालासँग पनि निकट छन् । 

यस्तै, महामन्त्रीमै राज थेवेले आकांक्षा राखेका छन् । ताप्लेजुङबाट पार्टी महाधिवेशन प्रतिनिधिसमेत रहेका उनी संस्थापन समूह निकट मानिन्छन् ।