किभ । युक्रेनका राष्ट्रपति भालोदिमिर जेलेन्स्कीले आफ्ना जनतालाई रुसी आक्रमणको डटेर प्रतिवाद गर्न आह्वान गरेका छन् ।साथै उनले युरोपेली मुलुकहरूलाई मद्दतका लागि थप कार्य गर्न अनुरोध गरेका छन् ।

आक्रमणको दोस्रोदिन पहिलोपटक रुसी ट्याङ्कहरू राजधानी किभ प्रवेश गरेको देखिएको छ । युक्रेनी सैनिक सवारी साधनहरू पनि प्रतिरक्षाका लागि दौडादौड गरिरहेको देखिन्छन् । 

यसैबीच युक्रेनी सरकारी अधिकारीहरूले स्वयमसेवकहरूलाई १८ हजार बन्दुक बाँडेको तथा तिनीहरूलाई पेट्रोल बम कसरी बनाउने भन्नेबारे निर्देशन दिइएको बताएका छन् । 

राष्ट्रको नाममा सम्बोधन गर्ने क्रममा जेलेन्स्कीले भनेका छन्, "मुलुकभरिनै युद्ध जारी छ । रुसी ट्याङ्कहरूले हाम्रा सहरहरूका आवासीय भवनहरूमा गोलाबारी गरिरहेका छन् ।"

अमेरिका, बेलायत र युरोपेली संघ सबैले मस्को माथि आक्रमणका लागि आर्थिक संजाय दिइसकेका छन् । तर तिनीहरूले अझैसम्म पनि रुसलाई अन्तर्राष्ट्रिय बैंकिङ प्रणाली (स्विफ्ट) बाट भने हटाइसकेका छैनन् । 

जेलेन्स्कीले भनेका छन्,"पश्चिम जगत, त्यसमा पनि विशेषगरी युरोप नजिकका मुलुकहरूले विना अबिलम्व थप कारबाही अघि बढाउनु पर्दछ । यो आक्रमण रोक्ने युरोपसँग प्रशस्त शक्ति छ । ट्याङ्क र लडाकु विमानबाट अहिले भइरहेको आक्रमणले ७५ वर्ष अघिको दोस्रो विश्व युद्धको सम्झना दिइरहेको छ । यसका प्रतिवादमा रुसलाई स्विफ्टबाट अलग्याउने, भिसा प्रतिबन्ध लगाउने र रुस तर्फको वायु क्षेत्र बन्द गर्ने जस्ता थुप्रै कार्य गर्न सकिन्छ ।"

युद्ध सुरु भएयता रुसले पहिलोपटक युक्रेन समक्ष वार्ताका लागि प्रस्ताव राखेपछि जेलेन्स्कीको यस्तो अभिव्यक्ति सार्वजनिक भएको हो ।    

बीबीसीबाट ।