काठमाडौं । बलात्कारको आरोप लागेका नेकपा (एमाले)का नेता तथा मुगुका सांसद मोहन बानियाँ प्रहरीको सम्पर्कमा आएका छन् । जिल्ला अदालत बाँकेले पक्राउ पुर्जी जारी गरेपछि सम्पर्कविहीन भएका बानियाँ प्रहरीको सम्पर्कमा आएका हुन् ।

जिल्ला प्रहरी कार्यालय बाँकेका प्रवक्ता डीएसपी मधुसूदन न्यौपानेले पूर्वमन्त्रीसमेत रहेका बानियाँले प्रहरीलाई सम्पर्क गरेर केही दिनमै प्रहरी कार्यालयमा उपस्थित हुने जानकारी गराएको बताए ।

‘‘हामीले प्रक्रिया अगाडि बढाउन सबै काम सकिसकेका छौँ । सांसद बानियाँले हामीलाई खबर गरेर केही दिनमा आउने भन्नुभएको छ । एमसीसीलगायत सदनका काम सकाएर म आफैँ आउँछु भन्नुभएको छ । नआए हामी आफ्नो तरिकाले पक्राउ गर्छौँ,” डीएसपी न्यौपानेले भने ।

यही फागुन ४ गते जुम्लाकी एक शिक्षिकाले सांसद बानियाँले बाँकेस्थित अप्सरा होटेलमा आफूमाथि जबरजस्ती करणी गरेको भनी मुद्दा दायर गरेकी थिइन् । त्यसपछि जिल्ला अदालत बाँकेले उनलाई पक्राउ गर्न आदेश दिएको थियो ।

ती शिक्षिकाले प्रहरीले बानियाँलाई पक्राउ गर्न आनाकानी गरिरहेको आरोप लगाएकी छन् । ‘‘पक्राउ पुर्जी जारी गरेको लामो समय भयो । अहिलेसम्म कुनै खबर आएको छैन,” उनले भनिन् ।

सांसद बानियाँले पनि आफू निर्दोष रहेको बताउँदै आएका छन् । उनले भनेका छन्, “मलाई फसाउने षड्यन्त्र भइरहेको छ ।”

ती शिक्षिकाले संयुक्त व्यावसायिक प्रयोजनका लागि बानियाँलाई २५ लाख रुपैयाँ दिएको तर फिर्ता नपाएको बताउँदै आएकी छन् । सांसद बानियाँले भने शिक्षिकाको पूरै पैसा फिर्ता दिइसकेको बताएका छन् ।