काठमाडौं । अखिल नेपाल फुटबल संघ (एन्फा)का पूर्व अध्यक्ष गणेश थापाले आफ्नो भाषणमा प्रायः नछुटाउने एउटा वाक्य हो, “हामीले विमल जस्तो प्रतिभावान खेलाडी जन्माएका छौं ।” विमल अर्थात विमल घर्तिमगर । थापाको त्यही एक वाक्यले पुष्टि गर्छ, विमल कति प्रतिभावान र सम्भावना बोकेका खेलाडी हुन् । त्यसैले त विमलले १४ वर्षको उमेरमै राष्ट्रिय टोलीमा डेब्यू गर्न सफल भए । २०१३ को साफ च्याम्पियनसिपमा पाकिस्तानविरुद्ध गोल गरेपछि विमलको चर्चा अझ चृुलिएको थियो ।
 
यति धेरै सम्भावना बोकेका विमलको फुटबल करिअर भने सिधा रेखामा अघि बढेन । सानो उमेरमै विमलले ठूलो उतारचढाव भोगेका छन् । कहिले पारिवारिक कारण र कहिले शारीरिक चोट । कहिले भने आफ्नै बानी व्यवहार । तर, यतिबेला विमल पुनः आफ्नो करिअरलाई ‘राइट ट्रयाक’मा हिँडाउने प्रयासमा छन् ।  

राष्ट्रिय टोलीका मुख्य प्रशिक्षक अब्दुल्लाह अल्मुताइरीले मोरिससविरुद्धको दुई मैत्रीपूर्ण खेलका लागि ३४ खेलाडीलाई बन्द प्रशिक्षणमा बोलाएका छन् । त्यसमा विमल पनि सामेल छन् । लामो समयको उतारचढावपछि विमल अहिले राष्ट्रिय टोलीमा पुनरागमन गर्ने जमर्को गरिरहेका छन् । पछिल्लो समय चोटका कारण लामो समय मैदानबाहिर रहेका विमलले सहिद स्मारक ‘ए’ डिभिजन लिगमार्फत मैदानमा फर्किएका छन् ।
 
“लिगमा मैले सुरुमा १५ मिनेट जति खेलेँ होला । विस्तारै खेल्दै गएँ । पछिल्ला खेलमा फुलटाइम खेलेको छु । लिगमा गरेकै प्रदर्शनका आधरमा राष्ट्रिय टोलीमा बोलाइएको हो,” बिहीबार एन्फा मुख्यालयको मैदानमा प्रशिक्षण सकिएपछि विमलले भने ।
 
लिगको नवौं चरणमा विग्रेड ब्वाइजविरुद्ध दुई गोल गरेपछि विमलले भनेका थिए, “राष्ट्रिय टोलीका प्रशिक्षकले बन्द प्रशिक्षणमा बोलाउनु भएको छ । सक्दो मिहिनेत गरेर राष्ट्रिय टोलीमा स्थान बनाउन चाहन्छु ।”

विमलले पछिल्लोपटक राष्ट्रिय टोलीबाट खेलेको जोर्डनविरुद्ध हो । २०७६ असोजमा विश्वकप छनोटमा जोर्डनविरुद्ध खेलेपछि विमल राष्ट्रिय टोली बाहिर छन् । फिफा विश्वकप छनोटअन्तर्गत नै कुवेतविरुद्धको खेलमा पनि विमललाई बोलाइएको थियो । तर, खेल्न भुटान जानु अघिल्लो राति डिस्को गएको भन्दै एन्फा अनुशासान समितिले विमलसहित चार खेलाडीलाई कारवाही गरेको थियो । जसका कारण विमलले भुटान यात्रा गुमाएका थिए ।

विमलको गत वर्ष पुस पहिलो साता प्रशिक्षणका दौरान घुँडामा चोट लागेको थियो । उनको घुँडाको एन्टेरियर क्रुसिएट लिगामेन्ट (एसीएल) च्यातिएको थियो भने मेडिएल कोल्याटरल लिगामेन्ट (एमसीएल) मा पनि हल्का चोट लागेको थियो । कतारस्थित अस्पेटर अस्पतालमा विमलको शल्यक्रिया भएको थियो ।
 
शल्यक्रियापछि चोटमुक्त भएर फर्किएका विमलले यही लिगमार्फत मैदानमा पुनरागमन गरेका हुन् । मछिन्द्रबाट खेलेका विमलले जारी लिगमा तीन गोल गरिसकेका छन् । विग्रेड ब्वाइजविरुद्धको खेलमा उनी उत्कृष्ट लयमा पनि देखिएका थिए ।
 
यसबीचमा विमलले राष्ट्रिय टोलीको धेरै खेल गुमाए । नेपालले विश्वकप छनोटमा सुखद नतिजा निकाल्न नसके पनि माल्दिभ्सामा सम्पन्न साफ च्याम्पियनसिपमा उत्कृष्ट प्रदर्शन गरेको थियो । त्यसअघि नेपालमै सम्पन्न त्रिदेशीय खेलको उपाधि जित्यो । भारतविरुद्ध घरेलु मैदानमा खेल्यो । नेपाल साफमा पहिलोपटक फाइनलमा पुग्न सफल भयो । विमलले साफको त्यो पललाई निकै धेरै ‘मिस’ गरे ।

“पहिलोपटक फाइनलमा पुग्न सफल भएको थियो । टिमको त्यो सफलतामा धेरै खुसी लाग्यो । तर, मैले ती क्षणहरुमा राष्ट्रिय टिमलाई एकदम धेरै मिस गरेँ,” विमलले भने, “अहिले आफूलाई सुधार गरेको छु । मान्छे उही विमल हुँ । तर, मैले बानी परिवर्तन गरेको छु ।”

मुख्य प्रशिक्षक अल्मुताइरीले यसपटक नयाँ खेलाडीलाई मौका दिन्छु भनेका छन् । विमल पनि अल्मुताइरीको प्रशिक्षणमा पहिलो पटक प्रशिक्षण गर्दैछन् । अल्मुताइरीले लिग अगाडि नै विमललाई भेटेका थिए । त्यतिबेला नै अल्मुताइरीले विमललाई भर्खरै चोटमुक्त भएर फर्किएकाले धेरै दबाबमा नखेल्न सुझाव दिएका थिए । विमलले पनि त्यसै गरे । उनले लिगका थोरै खेलमा मात्र ९० मिनेट खेले । जति समय मैदानभित्र विताए आफूलाई अब्बल सावित गरे ।

पछिल्लो समय नियमित राष्ट्रिय टोलीमा स्थान बनाएका नवयुग श्रेष्ठ चोटका कारण टिममा छैनन् । अल्मुताइरीले बोलाएका खेलाडीमध्ये अग्रपंक्तिमा सुशिल राई, सुनिल बल, सुमन लामा, मनिष डाँगी, दर्शन गुरुङ, अञ्जन विष्ट, आशिष लामा, विमल घर्तिमगर छन् । तर, नम्बर ९ मा विमलको प्रतिस्पर्धा अशिष लामासँग मात्र हुने देखिन्छ । त्यसकारण पनि विमलले राष्ट्रिय टोलीमा स्थान बनाउने लगभग पक्का छ ।
 
“हुन त उनले लिगमा धेरै खेल खेलका छैनन् । तर, पहिलेभन्दा अहिले विमलमा परिपक्कता देखिएको छ,” सहिद स्मारक ‘ए’ डिभिजन लिगका निर्देशक सञ्जिव मिश्रले भने, “मन लगाएर खेले भने विमल एक्ट्रा अडिनरी भएका खेलाडी हुन् । उनीजस्तो क्लास प्लेयर नेपाली फुटबलमा कमै छन् । अहिले नम्बर ९ को स्थानका लागि प्रतिस्पर्धा कम छ । त्यसकारण पनि विमलको राष्ट्रिय टोलीमा पर्ने सम्भावना लगभग पक्का छ । विमल टिम पर्यो भने अञ्जन विष्टलाई पनि सहयोग हुन्छ ।”

विमल र अञ्जन उमेर समूहदेखीका ‘स्ट्राइकिङ पार्टनर’ हुन् । एन्फा एकेडेमीका उनीहरु एउटै ब्याचका खेलाडी हुन् । अञ्जन र विमलबाहेक अहिले बन्द सत्रमा रहेका सुनिल बल, दिनेश राजवंशी, अनन्त तामाङ, पुजन उपरकोटी, तेज तामाङ पनि एन्फा एकेडेमीको एउटै ब्याचका खेलाडी हुन् ।
 
लिगका निर्देशक मिश्र थप्छन्, “घरमा एउटा इटा थपेको जस्तो हुन्छ । उनीहरु उमेर समूहबाट सँगै खेल्दै आएका छन् । विमलको आगमनले टिम अझ मजबुद बन्ने देखिन्छ ।”