जनकपुरधाम । प्रदेश २ कांग्रेसको नयाँ नेतृत्वका लागि बुधबार चुनाव हुँदैछ । कांग्रेस प्रदेश २ को सभापति पदका लागि कांग्रेस प्रदेश २ संसदीय दलका नेता तथा भौतिक पूर्वाधार विकासमन्त्री रामसरोज यादव र रौतहट जिल्ला सभापति कृष्ण यादव चुनावी मैदानमा छन् ।

मगंलवार बेलुका मतदानस्थल गोपाल धर्मशालामा पुगेर रामसरोज र कृष्णले मंगलबार सभापतिमा उमेदवारी दर्ता गराएका थिए । सभापतिमा उमेदवारी दिएका रामसरोजलाई नेता विमलेन्द्र निधि र शेखर कोइराला समूहको समर्थन छ । कृष्णलाई भने सभापति शेरबहादुर देउवाको समर्थन रहेको छ ।

यद्यपि रामसरोजले आफू कुनै गुटबाट नभई कांग्रेसबाट उमेदवारी दिएको बताए । आफूलाई सबैको समर्थन रहेको बताउँदै उनले आफ्नो जित सुनिश्चित रहेको दाबी गरेका छन् । कांग्रेस भित्र गुट उपगुट समाप्त पारेर कांग्रेसलाई मजबुत बनाउनकै लागि आफूले उमेदवारी दर्ता गराएको उनले प्रतिक्रिया दिए ।

उता संस्थापन पक्षबाट कृष्णले प्यानल बनाएर उमेदवारी दर्ता गराएका हुन् । उनको प्यानलबाट प्रदेश २ को महिला बालबालिका युवा तथा खेलकुदमन्त्री वीरेन्द्र सिंह र उपेन्द्र यादवले उपसभापति पदमा उमेदवारी दर्ता गराएका छन् ।

सभापतिका उम्मेदवार कृष्णले निर्वचित भए कांग्रेसलाई विगत जस्तै प्रदेश २ मा मजबुत बनाउने लक्ष्य रहेको बताए । उनले कांग्रेसका सबै नेता कार्यकर्तालाई साथ लिएर अगाडि बढ्ने बताए ।

सर्वसम्मतिमा प्रदेश कार्यसमिति चयन गर्ने पूर्व उपसभापति निधिको प्रयास असफल भएपछि कृष्ण र रामसरोज चुनावी मैदानमा उत्रिएका हुन् । देउवा र निधि समूहबीच प्रदेश समितिको ७२ पदमा प्रतिस्पर्धा हुनेछ । प्रदेश २ मा आफ्नो बलियो उपस्थिति रहेको भन्दै देउवा समूह निधि पक्षलाई नेतृत्व दिन तयार नभएपछि चुनाव हुन लागेको हो ।

केन्द्रीय महाधिवेशनपछि हुन लागेको प्रदेश अधिवेशनलाई दुवै पक्षले महत्वका साथ लिएको छ । देउवा पक्षका नेता तथा गृहमन्त्री बालकृष्ण खाण दलबलसहित जनकपुरमा गृहकार्यमा लागि सकेका छन् । नवनिर्वाचित सहमहामन्त्रीद्वय महेन्द्र यादव, फरमुल्लाह मन्सुर, केन्द्रीय सदस्यहरू चित्रलेखा यादव, सुरेन्द्रराज पाण्डे, रामहरि खतिवडा, उदय शमशेर राणा, आनन्द ढुंगाना रमेश रिजाल आफ्नो पक्षमा परिणाम निकाल्न कस्सिएर लागेका छन् ।

यता निधि पक्षका प्रभावशाली नेताहरूसमेत जनकपुरमा छन् । निधि आफैँ पनि  मैदानमा खटिएका छन् ।