दाङ । दाङको तुलसीपुरस्थित सिरखोला नजिकै जिप दुर्घटना हुँदा तीन जनाको मृत्यु भएको छ । अन्य १९ जना घाइते भएका प्रहरीले जानकारी दिएको छ ।

तुलसीपुरबाट सल्यानको सिमपानी जाँदै गरेको रा १ ज ४३८ नम्वरको जिप तुलसीपुर ३ सिरखोला नजिकै दुर्घटनामा परेको इलाका प्रहरी कार्यालय तुलसीपुरले जनाएको छ ।

प्रहरीअनुसार दुर्घटनामा परी मृत्यु हुनेमा कपुरकोट ३ बस्ने ४८ वर्षीय प्रेमप्रकाश शर्मा, कपुरकोट ४ बस्ने सौनी घर्ती र लालमती खड्का रहेका छन् ।

घाइतेमध्ये ६ जनालाई थप उपचारका लागि नेपालगन्ज लगिएको छ । बाँकी १३ जनाको राप्ती प्रादेशिक अस्पताल तुलसीपुरमा उपचार भइरहेको छ ।

घाइते हुनेमा सल्यानको कपुरकोट गाउँपालिका ४ धनबाङ बस्ने २२ वर्षीया लक्ष्मी बुढा, सोही गाउँपालिका ३ बस्ने ४५ देवा चापागाईं, २७ वर्षीय भूपबहादुर थापा, २२ वर्षीय धर्म थापा, उनका छोरा ५ वर्षीय दिपेश थापा, सोही गाउँपालिका ४ किमिरेचौर बस्ने ३६ वर्षीय डम्बर बहादुर बुढाथोकी, १८ वर्षीया अनिता पुन, सोही गाउँपालिका १ बस्ने आरति पुन, सोही गाउँपालिकाकी १९ वर्षीया रमिता बस्नेत लगायतका रहेका छन् ।

जिप चालक भने फरार रहेको प्रहरीले बताएको छ ।