काठमाडौं । नवौँ महाधिवेशनदेखि महाधिवेशन प्रतिनिधिमा निर्वाचित हुँदै आएका धनुषाका रामपल्टन साह १४ औं अधिवेशन आइपुग्दा बल्ल केन्द्रीय नेतृत्वमा जाने तरखरमा छन् । चुनावी मैदानमा उत्रिएका उनी आफ्ना प्रचार सामग्री आफैं वितरण गर्दै मत मागिरहेका छन् । उनले भने,"पार्टीलाई रुपान्तरण आवश्यक छ अब हामी जस्ता युवा नेतृत्वमा आउनु पर्छ ।" 

कांग्रेस नेतृत्व र नयाँ सोचलाई व्यवहारलाई कार्यान्वयन गराउनुपर्ने साह बताउँछन् । साह मधेशी आरक्षण कोटामा केन्द्रीय सदस्यमा उठेका छन् ।

उमेदवार मनोयनका दिन शनिबार अनुपम जस्तै कपिलवस्तुका अकील मिया पनि भोट माग्न व्यस्त देखिन्थे । अल्पसंख्यकको मुद्दालाई पार्टी तहमा घनीभूत रुपमा उठाउन आफू उमेदवार बनेको मियाले बताए । भने,"म निकै लामो समयसम्म पार्टीको तल्ला तहमा बसेर योगदान दिएं अब केन्द्रीय तहमा पुगेर काम गर्ने ईच्छा छ ।" 

मिया कांग्रेस क्षेत्रीय सभापति, नेविसंघ केन्द्रीय सदस्य र तरुण दल केन्द्रीय सदस्यको जिम्मेवारीमा रही काम गरेका थिए । 

प्रमिला राई महिला जनजाति तर्फ केन्द्रीय सदस्यमा मनोनयन दर्ता गराउन अगावै मत माग्न ब्यस्त छिन् । महिला र अल्पसंख्यकको अधिकार र उत्थानको पैरवी गर्न र पार्टीका तिनका विषयको प्रतिनिधित्व गर्न आफू उमेदवार बनेको बताईन । उदयपुरबाट संघीय सांसद समेत रहेकी राई भन्छिन्,"पार्टीमा महिला नेतृत्वलाई सशक्त बनाउन र सैद्धान्तिक रुपमा कांग्रेसलाई आफ्नो बाटोमा ल्याउन योगदान दिने योजना छ ।" 

डा. डिला संग्रौलाले महिला केन्द्रीय सदस्यमा उमेदवार बन्ने योजनाअनुरुप मनोनयन दर्ता गर्ने बताइन् । मोरङबाट राजनीति गर्ने उनी महिला संघको केन्द्रीय नेतृत्वमा पुगेको र अब पार्टीको केन्द्रीय तहमा महिला हक अधिकार जागरण गराउने बताइन् ।

झापाकी उषा गुरुङ पनि केन्द्रीय नेतृत्वमा पुग्ने तयारीमा लागेकी उनले भनिन्,"म संविधान सभाको सदस्यको जिम्मेवारीमा पनि थिए अब पार्टीको संगठन सुदृढीकरणमा सकृय हुनेछु ।"