जनकपुरधाम । सीता राम विवाहपञ्चमीको तयारी सुरु भएको छ । अर्को सातादेखि सुरु हुने सप्ताहव्यापी विवाहपञ्चमीको तयारी अन्तिम चरणमा पुगेको छ ।

जानकी मन्दिरका सहायक महन्थ रामरोसन दासका अनुसार अन्तिम तयार भइरहेको छ । उनका अनुसार यसवर्ष सीता राम विवाहपञ्चमीमा भारत (अयोध्या)बाट करिब पाँचलाख जन्ती आउने उनको दाबी छ ।

‘अयोध्यामा हामीले निमन्त्रणा गरेका थियौं । उताबाट आएको जानकारीअनुसार विभिन्न साधुसन्तसहित करिब पाँचलाख जन्ती आउने भनेका छन्,” उनले भने, “राजनीतिक व्यक्तिलाई हामीले निमन्त्रणा गरेका छैनौँ । स्वेच्छाले आउने व्यक्तिलाई हामीले रोक्न सक्दैनौं ।”

३० लाख खर्च हुने अनुमान

यसवर्ष सीताराम विवाह पञ्चमीमा करिब ३० लाख खर्च हुने अनुमान गरिएको छ । तीनै तहका सरकारमध्ये यसवर्ष कसैले पनि विवाहपञ्चमी मनाउन आर्थिक सहयोग नगरेको महन्थ रोसन दासले गुनासो गरे ।

जानकी मन्दिरको आन्तरिक स्रोत र विभिन्न शुभेच्छुक दाताबाट विवाह पञ्चमी मनाउने मन्दिरको तयारी छ ।

जानकी मन्दिरको प्राङ्गणमा सोमबारदेखि राम कथा प्रवचन र रामलीला सुरु भइसकेको छ । मंसिर १७ गते नगर दर्शन, १८ गते फुलबारी लीला, १९ गते धनुष यज्ञ, २० गते तिलकोत्सव, २१ गते मटकोर, २२ गते स्वयम्बर तथा विवाह र २३ गते रामकलेवा विधि गरी विवाहपञ्चमी सम्पन्न हुने तालिका रहेको छ ।

१२ सय प्रहरी परिचालन हुने

सप्ताहव्यापी विवाहपञ्चमीमा सुरक्षा व्यवस्था कडा बनाइने छ । यस वर्ष १२ सय नेपाल प्रहरी विवाहपञ्चमीमा सुरक्षाको लागि खटाइने धनुषाका प्रहरी नायव उपरीक्षक जितेन्द्र बस्नेतले जानकारी दिए ।

५१ जोडीको सामूहिक विवाह हुने

विवाह पञ्चमीको अवसरमा ५१ जोडीले विवाह गर्ने तयारी गरेका छन् । विश्व हिन्दु परिषद् नेपालको अगुवाइमा मंसिर २३ गते जानकी मन्दिर प्राङ्गणमा ५१ जोडीले सामूहिक विवाह गर्ने तयारी गरिएको छ ।

दाइजो प्रथा अन्त्य गर्न सामूहिक विवाहको आयोजना हुँदै आएको छ । उनीहरुको विवाहमा हुने खर्च आयोजक संस्थाले बेहोर्ने व्यवस्था छ ।