सौराहा । नेकपा (एमाले)को १०औँ राष्ट्रिय महाधिवेशनअन्तर्गत निर्वाचनको तयारी तीव्र पारिएको छ । निर्धारित तालिकाअनुसार आज राति ९ बजेदेखि मतदान हुनेछ ।

अध्यक्षसहित उपाध्यक्ष, सचिव पदमा निर्वाचन हुन लागेको हो । पदाधिकारीमा वरिष्ठ उपाध्यक्ष, महासचिव र उपमहासचिव भने निर्विरोध चयन भएका छन् ।

चितवनको सौराहस्थित होटेल सेभेन स्टारको एउटा हलमा मतदानस्थल तयार गरिएको छ । विद्युतीय मेसिनबाट मतदान हुनेछ । बढीमा १०० वटा मेसिनबाट मतदान हुने एमाले केन्द्रीय निर्वाचन आयोगका अधिकारीहरूले जानकारी दिएका छन् ।

राम–लक्ष्मण भोटिङ मेसिनबाट मतदान हुन लागेको हो । उक्त भोटिङ मेसिनका निर्मातामध्येका एक राम रिमालले आफूहरू तयारी अवस्थामा रहेको बताए ।

“हामी तम्तयार अवस्थामा छौँ । मेसिनमा गर्नुपर्ने प्राविधिक परीक्षणका कामहरू सकाइसकेका छौँ,” उनले बाह्रखरीसित भने ।

मतदानअघि अन्तिम परीक्षण गरेर मात्रै मतदाताका लागि भोटिङ मेसिन खुला गरिने उनले जानकारी दिए । त्यस्तो प्रक्रियाका लागि ६/७ सात घण्टाको समय लाग्ने उनले बताए ।

एकजना मतदातालाई भोटिङ गर्न करिब ३० मिनेट लाग्ने अनुमान गरिएको उनको भनाइ छ । यस्तै, मतगणना गर्न तीन–चार घण्टा लाग्ने उनले जानकारी दिए ।

भिडियो हेर्नोस्–