जनकपुरधाम । प्रधानन्यायाधीश चोलेन्द्रशमशेर जबराको राजीनामा माग गर्दै आज जनकपुरका वकिलहरू पनि धर्नामा बसेका छन् ।

नेपाल बार एसोसिएसन धनुषामा आबद्ध वकिलहरू उच्च अदालत जनकपुर र जिल्ला अदालत धनुषाको प्रवेशद्वारमा धर्नामा बसेका हुन् । हातमा कालोपट्टी बाँधेर उनीहरू धर्नामा बसे ।

न्यायिक र प्रशासनिक शुद्धीकरणका लागि अदालतअगाडि एक घण्टा धर्ना दिइएको अधिवक्ता श्याम मिश्रले जानकारी दिए । प्रधानन्यायाधीशमाथि प्रश्न उठेपछि राजीनामा माग गर्दै वकिलहरू धर्नामा बसेको उनले बताए ।

“प्रश्न उठेपछि राजीनामा दिएर निकास दिनुपर्‍यो नि, शुद्धीकरणमा साथ दिनुपर्‍यो,” उनले भने, “जनताको मागअनुसार हामीले राजीनामा मागेका छौँ ।”

नेपाल बार एसोसिएसनको आह्वानमा कानुन व्यवसायीहरू प्रधानन्यायाधीशको राजीनामा माग्दै आन्दोलनरत छन् ।