काठमाडौं । काठमाडौंस्थित थापाथलीमा दुई ठूला अस्पताल छन्, प्रसुति गृह र नर्भिक । यि दुवै अस्पतालमा बिरामीको ठूलै चाप रहन्छ । सधैँ व्यस्त र बिरामीको निकै भीड रहने दुई अस्पताल जाने यो बाटोको दुरावस्था भएको महिनौं भइसक्यो तर, सरोकारवालाहरुको ध्यान पटक्कै गएको छैन ।
काठमाडौं महानगरपालिका वडा नम्बर ११ मा पर्ने यो सडक खण्ड निर्माण सम्पन्न भइसक्नुपर्ने चारमहिना अगाडि नै हो । तर, सरकारी निकायले समन्वय नगर्दाको परिणाम हजारौं बिरामी र आफन्तले भोग्न बाध्य भएका छन् ।
मेलम्ची खानेपानी आयोजना, काठमाडौं उपत्यका खानेपानी संस्थान, नेपाल टेलिकम र नेपाल विद्युत् प्राधिकरणका कारण यो सडकको दुरावस्था भएको वडा नम्बर ११ का अध्यक्ष हिरालाल तण्डुकार बताउँछन् । एउटा निकायले सडक खन्ने र आफ्नो काम गर्ने, फेरि अर्को निकायले सडक खन्ने र त्यसै छोड्ने गरेकाले यो अवस्था आएको उनको भनाई छ ।
त्यसो त नर्भिक अस्पताल व्यवस्थापनले आफ्नै खर्चमा यो सडक खण्डका खाल्डा खुल्डी पुर्न नखोजेको पनि होइन । एक पटक त पुरेको पनि थियो । पछि फेरि यस्तै भयो । पटक पटक ताकेदा गर्दा पनि सरोकारवालाले सडक बनाउन ध्यान नदिएको अस्पतालका प्रमुख कार्यकारी अधिकृत अजय मिश्र बताउँछन् ।
अस्पतालले आफ्नै खर्चमा सडक बनाउन खोज्दा वडाले नदिएको आरोप अस्पतालको छ ।
आफुले धेरैपटक मेलम्ची खानेपानी आयोजना, काठमाडौं उपत्यका खानेपानी संस्थान, नेपाल टेलिकम र नेपाल विद्युत प्राधिकरणलाई आफ्नो काम सक्न भनेको तर एउटा निकायले सकेको काम अर्को निकायले बिगारिदिँदा लामो समयसम्म यो सडक नबनेको उनले बताए ।
निर्माण कम्पनीले पनि विभिन्न बहाना बनाउँदै आएको पनि उनले बताए । अब पनि ठेकेदारले यो सडक नबनाए कारबाही गर्ने चेतावनी वडाको छ ।
