जनकपुरधाम । निर्वाचनको चार वर्षपछि महोत्तरीको एउटा वडाको मतगणनामा मत परिणाम उल्टिएको छ ।

महोत्तरीको मनरा सिस्वा नगरपालिका १० को मतगणना आइतबार दिउँसोदेखि उच्च अदालत जनकपुरमा भएको थियो ।

उच्च अदालतका रजिष्ट्रार खड्गराज अधिकारीले दिएको जानकारीअनुसार चार वर्षपछि परिणाम उल्टिएको छ ।
अदालतको आदेशअनुसार पुनः मतगणना भएको थियो ।

त्यसबेला दुवै उमेदवारको समान मत आएपछि गोलाप्रथाबाट नतिजा घोषणा गरिएको थियो । 

पछि पराजित उमेदवारले मुद्दा दर्ता गरेपछि अदालतले विवाद रहेको ठाउँमा पुनः मतगणना गर्ने आदेश दिएको छ । सोही आदेशअनुसार आज पुनः मतगणना भएको हो ।

०७४ असोज २ गते स्थानीय तहको निर्वाचन भएको थियो । निर्वाचन भएको ६ दिनपछि त्यहाँको नतिजा सार्वजनिक गरिएको थियो । 

स्वतन्त्र उमेदवार रमेशकुमार राय र नेपाली कांग्रेसका अरुणकुमार चौधरीबीच कडा प्रतिस्पर्धा देखिएको थियो । अन्तमा दुवै उमेदवारले समान २ सय ६७ मत ल्याएपछि गोला प्रथाबाट चौधरी निर्वाचित भएका थिए ।

पराजय अस्वीकार गर्दै रायले अदालतमा मुद्दा दर्ता गरेका थिए ।

उच्च अदालतले ०७५ असार २१ गते १५ दिनभित्र पुनः मतगणना गर्न आदेश दिएको थियो । उच्च अदालतको आदेशपछि निर्वाचित चौधरी सर्वोच्च अदालत पुगेका थिए । सर्वोच्चले उच्च अदालत जनकपुरको आदेशलाई सदर गरिदिएपछि पुनः मतगणना भएको थियो ।

मत गणनाअनुसार राय दुई मतले निर्वाचित भएका थिए । पुनः मतगणनाअनुसार रायले २६८ र चौधरीले २६६ मत ल्याएका छन् ।