काठमाडौं । नेसनल इन्जिनियर्स एसोसिएसन नेपालले इन्जिनियर पेसामाथिको दमन बन्द गर्न माग गरेको छ ।
शनिबार काठमाडौंको माइतीघरमा एसोसिएसनमा आबद्ध इन्जिनियरहरूले विरोध प्रदर्शन गरे । त्यसक्रममा इन्जिनियरमाथि हुने हरेक दमनलाई रोक्न माग गरिएको हो ।
सीके राउत नेतृत्वको जनमत पार्टीका कार्यकर्ताले जनकपुरधामस्थित खानेपानी तथा ढल व्यवस्थापन कार्यालयका प्रमुख राजेश कुशवाहमाथि दुर्व्यवहार गरेको भन्दै उनीहरूले प्रदर्शन गरेका हुन् । उनीहरूले कुशवाहलाई मोसो दलेर नांगै जनकपुरधाम परिक्रमा गराउने कार्य गलत मात्रै नभएर अमानवीय भएको बताए ।
कुशवाहलाई राज्यले न्याय नदिए आन्दोलन चर्काउने चेतावनी पनि त्यसक्रममा दिइएको थियो ।
प्रदर्शनकारीले 'इज्निनियरहरूमाथि दमन गर्न पाइँदैन', 'पीडितलाई न्याय दे'लगायत नारा लगाएका थिए ।