काठमाडौं । राष्ट्रिय पुरुष तथा महिला एनभीए क्लब भलिबल च्याम्पियनसिपको छैटौँ संस्करणमा आइतबार पुरूषतर्फ सबै विभागीय टोलीले विजयी सुरुवात गरेका छन् ।

पहिलो दुई खेलमा त्रिभुवन आर्मी क्लब र सशत्र प्रहरी बल (एपीएफ)ले  जित्दा दिन अन्तिम खेलमा नेपाल पुलिस क्लबले पनि विजयी नजिता निकालेको हो ।

नेपाल पुलिस क्लबले दावाँली मिलन क्लबलाई ३–० को सोझो सेटमा   हरायो । राष्ट्रिय टोलीमा भएका खेलाडीको वर्चस्व रहेको पुलिसले २५–१७, २५–२१ र २५–१३ को सहज सेटमा हराएको हो ।

गलकोट स्पोर्ट्स क्लबले वाग्मती प्रदेशलाई ३–० को सोझो सेटमा हराएको छ ।  गलकोटले वाग्मतीलाई २५–१८, २५–१७ र २५–१७ को सेटमा हराएको हो ।

आजै, सम्पन्न अघिल्ला खेलमा अर्को दुई विभागीय क्लब त्रिभुवन आर्मी र सशस्त्र प्रहरी बल (एपीएफ) क्लबले पनि विजयी नतिजा निकालेका थिए ।

आर्मीले कर्णाली प्रदेशलाई ३–० को सोझो सेटमा हराएको थियो भने  एपीएफले  ढोरपाटन स्पोर्ट्स क्लबलाई ३–१ को सेटमा हरायो ।

सोमबार पुरुषतर्फका ६ खेल हुनेछन् । पहिलो खेलमा हेल्प नेपाल स्पोर्ट्स क्लब र वाग्मती प्रदेशले प्रतिस्पर्धा गर्नेछ भने दोस्रो खेलमा प्रदेश–२ ले गलकोट स्पोर्ट्स क्लबविरुद्ध खेल्नेछ । तेस्रो खेलमा दावाँली मिलनले गण्डकी प्रदेशसँग प्रतिस्पर्धा गर्नेछ । नेपाल पुलिसले मणिमुकुन्द भलिबल क्लबविरुद्ध खेल्नेछ ।

पाँचौँ खेलमा नयाँ बजार युवा क्लबले कर्णाली प्रदेशसँग खेल्नेछ । अन्तिम खेलमा बूढानीलकण्ठ भलिबल क्लबले ढोरपाटन स्पोर्ट्स क्लबसँग प्रतिस्पर्धा गर्नेछ ।