जनकपुरधाम । धनुषाको सबैला नगरपालिकामा पाँच दिनदेखि सूचना माग गर्दै रिले अनशन भइरहेको छ । भदौ ४ गतेदेखि पालिकाको प्रवेशद्वारमा ‘भ्रष्टाचारविरुद्ध संयुक्त संघर्ष समिति’ का पदाधिकारी र राजनीतिकर्मीहरूले सूचनाको माग गरेर रिले अनशन गरिरहेका छन् ।

समितिले पालिकामा गत जेठ २३ गते विभिन्न ९ वटा शीर्षकमा सूचना मागेको थियो । त्यसअघि मौखिक रूपमा पनि सूचना माग गरेको थियो । तर, कर्मचारी र नगर प्रमुख विजय शंकर साहले बेवास्ता गरेपछि रिले अनशन थालेको समितिका संयोजक सुरेश यादवले जानकारी दिए ।

नगरका जनप्रतिनिधिहरूले विकासभन्दा कमिसनलाई प्राथमिकतामा राखेको उनीहरूको आरोप छ । अनशनकारीहरूले पालिकाले भ्रष्टाचार गरेकै कारण सूचना दिन आनाकानी गरिरहेको बताए । भ्रष्टाचारविरुद्ध बोल्ने, लेख्नेविरुद्ध नगर प्रमुख साह आक्रमक शैलीमा प्रस्तुत हुने गरेको समितिका महासचिव मेथल साहले बताए ।

“भ्रष्टाचार भएको छैन भने सूचना दिन किन अनाकानी गरिरहेको ? नागरिकको अधिकारलाई कुण्ठित गर्न मिल्दैन नि,” उनले भने ।

उनले स्थानीय सरकार सञ्चालन ऐनअनुसार पालिका आफैँले चौमासिकमा रूपमा सूचना सम्प्रेषण गर्नुपर्ने भएपनि सूचना माग्दासमेत नदिएको गुनासो पोखे । 

उनीहरूले चालु आर्थिक वर्षको बजेट र योजनाको दास्ताबेज, संसदीय विकास कोषबाट काम भएको योजनाको स्पष्ट विवरण, क्वारेन्टाइन सञ्चालन र रोकथामका लागि खर्च भएको सम्पूर्ण आयव्ययको सूचना माग गरेका छन् । यस्तै, कोरोना महामारीमा वितरण भएको राहत प्राप्तकर्ताको नामावली, संघ र प्रदेश सरकारले पठाएको सर्सत अनुदानको स्पष्ट विवरण र नगरका पोखरीहरूको आम्दानीको विवरण पनि माग गरिएको छ ।

त्यस्तै, राम जानकी मावि सतोषरलाई नमुना विद्यालय शीर्षकमा प्राप्त सम्पूर्ण आम्दानी र खर्चको विवरण, दुर्गापथको डीपीआरको प्रतिलिपी, स्थगनको कारण, र पालिकाको भवन निर्माणमा भएको सम्पूर्ण खर्चको सूचना उपलब्ध गराउनुपर्ने समितिको माग छ ।