काठमाडौं । एभरेस्ट प्रिमियर लिग (ईपीएल) को नयाँ संस्करण शनिबारबाट सुरु हुदैछ । प्रतियोगिता सुरु हुनु दुई दिनअघि ललितपुर प्याट्रियट्सका कप्तान ज्ञानेन्द्र मल्लले ईपीएल नखेल्ने घोषणा गरे । त्यही ललितपुरले प्रतियोगिताको पहिलो खेलमै काठमाडौं किङ्स–११ विरुद्ध प्रतिस्पर्धा गर्दैछ । 

ललितपुर प्रतियोगिताको साविक विजेता टोली हो । उपाधि रक्षा गर्ने अभियानमा रहेको ललितपुरलाई कप्तान ज्ञानेन्द्रले सुरुमै झट्का दिएका छन् । व्यक्तिगत कारण देखाउँदै प्रतियोगिता नेखेल्ने निर्णय गरेर । तर, ज्ञानेन्द्रले छाडेपछि कप्तानीको जिम्मेवारी पाएका कुशल भुर्तेलले टोलीमा केही असर नपर्ने विश्वास व्यक्त गरेका छन् । 

“क्रिकेट टिम गेम हो । यसमा एक व्यक्तिको प्रदर्शन भन्दापनि पूरै टिमको प्रदर्शनले नतिजा निस्कने गर्छ । त्यसकारण उहाँको अनुपस्थितिले हाम्रो प्रदर्शन पर्दैन भन्ने विश्वास लिएका छौँ । सबै खेलाडीको मिहेनत चाहिन्छ । टिम गेम खेल्यो भने नतिजा पनि राम्रो आउँछ । हामी सोही मनोभावले अघि बढिरहेका छौँ,” पछिल्लो समय ओपनिङमा उत्कृष्ट प्रदर्शन गरेका कुशलले भने । 

उद्घाटन खेल कीर्तिपुरस्थित त्रिवि क्रिकेट मैदानमा मध्याह्न सवा १२ बजेबाट सुरु हुँदैछ । ईपीएलमा कुशलले कप्तानी गर्न लागेको यो पहिलोपटक हो । राष्ट्रिय टोलीमा आफूलाई स्थापित गरिसकेका कुशलले कप्तानको नयाँ जिम्मेवारीलाई अवसरको रूपमा लिएको बताए ।

“पहिलोपटक कप्तानी गर्दैछु । मेरा लागि यो अवसर र चुनौती दुवै हो,” जिम्मेवारी नयाँ भएपनि आफ्नो व्यक्तिगत प्रदर्शनमा कुनै असर नपर्ने भन्दै कुशलले थपे, “व्यक्तिगत प्रदर्शनमा कुनै असर पर्दैन । अझै उत्कृष्ट प्रदर्शन गर्ने जोस आउँछ ।” 

कुशल टिमको तयारी राम्रो भएकाले नतिजा पनि राम्रो आउनेमा विश्वस्त छन् । काठमाडौंविरुद्धको खेलबारे कुशल थप्छन्, “उनीहरूको पक्कै बलियो टिम हो । हामीले पनि सोहीअनुसारको तयारी गरेका छौँ । विदेशी खेलाडीले टिम थप बलियो बनेको छ ।”

ललितपुरले विदेशी खेलाडीमा अजमातुल्लाह ओमरजाई, ओसाडा फार्नान्डो, साहनडुन वेराकेडी र मिक्यो दोर्जीलाई टिममा अनुबन्ध गरेको छ । 

ललितपुर र काठमाडौं यसअघि ईपीएलमा तीनपटक आमनेसामने भएका छन् । त्यसमा ललितपुर हाबी छ । ललितपुरले तीनवटै खेलमा जित निकालेको छ ।

२०१८ को सिजन भएको समूह चरणको पहिलो खेलमा काठमाडौंमाथि ललितपुरले १० विकेटको जित निकालेको थियो । त्यसपछि पहिलो क्वालिफायर्समा काठमाडौंमाथि ललितपुरले १ विकेटको जित हात पारेको थियो । त्यस्तै २०१७ मा ललितपुरले काठमाडौंलाई ७ विकेटले हराएको थियो । साविकको विजेता ललितपुरले गत सिजनको फाइनल खेलमा भैरहवा ग्लाडियटर्समाथि १४ रनको जित निकालेको थियो । 

काठमाडौं पाकिस्तानका अलराउन्डर सहिद अफ्रिदीको आगमनले उत्साहित छ । काठमाडौंका कप्तान सन्दीप लामिछानेले पनि अफ्रिदीको आगमनले टिम बलियो बनेको बताएका छन् । सन्दीपले अघिल्लो सिजनमा भएको प्रदर्शनलाई सुधार गर्ने लक्ष्यसहित अघि बढेको बताए । 

“काठमाडौंको पहिले पनि टिम बलियो थियो । त्यसमाथि विश्व स्तरमा नाम चलेका खेलाडीहरूको आगमनले हाम्रो टिमको हौसला धेरै बढेको छ । उनीहरूबाट नयाँ युवा पुस्ताले धेरै कुरा सिक्न पाउनेछन् । साथै नेपाली क्रिकेटको विकासमा पनि केही सहयोग पक्कै पुग्नेछ,” काठमाडौंका कप्तान सन्दीपले भने ।