चितवन । चितवनको सौराहामा स्थानीय पालिकालाई विपद् जोखिम न्यूनीकरण र व्यवस्थापनका लागि प्रशिक्षण दिन थालिएको छ । स्थानीय पालिकाका वातावरण तथा विपद् व्यवस्थापन शाखाका कर्मचारीलाई लक्षित गर्दै पांँच दिने प्रशिक्षण कार्यक्रम थालिएको हो ।

एसियाली विपद् पूर्व तयारी केन्द्र (एडीपीसी)को मुख्य आयोजना र रत्ननगर नगरपालिकाको आर्थिक सहयोगमा उक्त प्रशिक्षक प्रशिक्षण कार्यक्रम सोमबारबाट सुरु भएको हो । 

पहिलोदिन आज जिल्लामा हुने विपद्का घटना न्यूनीकरण र विपद् प्रभावितका लागि गरिने उद्धार, आर्थिक, सामाजिक, भौतिक सहयोगका मापदण्ड, सरकारले यस विषयमा लागु गरेका ऐन, नीति निर्देशिका र नियमावलीका विषयमा प्रशिक्षण दिइएको थियो । 

एडीपीसीका राष्ट्रिय जनप्रतिनिधि मानबहादुर थापाले नेपाल प्राकृतिक प्रकोप र विपदको उच्च जोखिममा रहेकाले यसको न्यूनीकरण र व्यवस्थापनका बारेमा स्थानीय पालिकाका वातावरण तथा विपद् व्यवस्थापन शाखाका स्रोत व्यक्तिलाई पांँच दिन प्रशिक्षण दिइने बताए ।