काठमाडौं । मुख्य प्रशिक्षक डेभ वाटमोरले शुक्रबार अप्रत्याशित रूपमा राजीनामा दिएपछि नेपाली राष्ट्रिय क्रिकेटमा एक खालको अन्योलता छाएको छ । नेपाल क्रिकेट संघ (क्यान)सँग एक वर्षका लागि सम्झौता गरेपनि समयसीमा सकिनुअघि नै ह्वाट्मोरले पदबाट हट्ने निर्णय गरेका छन् । उनले कोभिड–१९ महामारील‍े  परिवारसँगै बस्न नपाएको कारण देखाएर राजीनामा दिनुपरेकाे बताएका छन् । 

नेपाली क्रिकेट टोली आईसीसी विश्वकप लिग–२ अन्तर्गत अमेरिका र ओमानविरुद्धको त्रिदेशीय शृंखला खेल्नका लागि ओमान छ । नेपालले मस्कटमा भदौ २८ देखि असोज ४ गतेसम्म त्रिदेशीय शृंखला खेल्नेछ । त्यसअघि नेपालले पीएनजीसँग दुई एकदिवसीय अन्तर्राष्ट्रिय क्रिकेट खेल्नेछ । 

यस्तो महत्वपूर्ण प्रतियोगिताको मुखैमा मुख्य प्रशिक्षक वाटमोरले राजीनामा दिएका हुन् । प्रशिक्षकको अपर्झटको निर्णयले क्यान पनि चकित भएको छ । प्रशिक्षकको राजीनामासँगै अब क्यानले विकल्प खोज्नुपर्नेछ ।

‘‘हामीले अहिले तत्काल नयाँ दरखास्त आह्वान गरेर प्रशिक्षक ल्याउने सोच बनाएका छैनौँ । पहिले हामीले अन्र्तवार्ता लिएका मध्येबाटै कोही एक जनालाई ल्याउने प्रयास गर्नेछौँ,’’ नेपाल क्रिकेट संघका सचिव अशोकनाथ प्याकुरेलले बाह्रखरीसँग भने । 

मुख्य प्रशिक्षक नियुक्तिका लागि क्यानमा ७२ जनाले आवेदन दिएका थिए । त्यसबाट सुरुमा २५ जनाको ‘सर्टलिस्ट’ तयार पारियो । उनीहरूमध्ये पनि लिस्ट ‘ए’मा परेका १४ जनालाई अन्तर्वार्तामा बोलाइएको थियो ।

क्यानले वाट्मोरलाई नियुक्त गर्ने क्रममा अन्तिममा चार जनालाई छनोट गरेको थियो । त्यसमध्येबाट पनि क्यानले वाटमोरलाई रोजेको थियो । नेपालका पूर्व प्रशिक्षक पुबुदु दशानायके, अपूर्व सुबोधभाइ देसाई, नेइल क्याक्रेइ लगायतले अन्तरवार्ता दिएका थिए ।

क्यानका सचिव प्याकुरेलले अब सुबोधभाइ देसाइ, क्याक्रेइ र पुबुदुलाई पुनः सम्पर्क गर्ने बताएका छन् । ती तीन जना नेपाल आउन नमानेमा अन्य प्रशिक्षक खोज्ने प्याकुरेलले बताए । 

“तीन जना प्रशिक्षकलाई हामीले विकल्पका रूपमा राखेका थियौँ । अब हामीले उनै तीन जनामध्ये एकलाई ल्याउने प्रयास गर्नेछौँ । त्रिदेशीय शृंखला सकिने विक्तिकै मुख्य प्रशिक्षक नियुक्तिको प्रक्रिया थाल्नेछौँ,” प्याकुरेलले बाह्रखरीसँग भने । 

वाटमोर डिसेम्बर २०२० मा नेपालको प्रशिक्षकमा नियुक्त भएका थिए । उनले २०२१ जनवरीबाट नेपाली टोलीको प्रशिक्षण सम्हालेका हुन् । उनको प्रशिक्षणमा नेपालले घरेलु मैदानमा भएको मलेसिया र नेदरल्यान्ड्सविरुद्धको टी–ट्वान्टी क्रिकेट सिरिजनको उपाधि जितेको थियो । 

जसमा नेपालका लागि युवा खेलाडी कुशल भुर्तेलले डेब्यू सिरिजमा लगातार तीन खेलमा अर्धशतक बनाउने कीर्तिमान बनाएका थिए । 

क्यानले यसअघि भारतीय मुलका प्रशिक्षक लालचन्द राजपुतलाई पनि मुख्य प्रशिक्षक बनाउने प्रयास गरेको थियो । तर, अन्तिम समयमा लालचन्दले नेपाल अउन नमान्दा क्यानले दर्खास्तमार्फत मुख्य प्रशिक्षक नियुक्तिको प्रक्रिया अघि बढाएको थियो ।
 
नेपालका लागि पहिलो रोजाइमा रहेका पुबुदु अहिले कुनै पनि टिमसँग आवद्ध छैनन् । उनी नेपाल आउने कुरा भने चलेको छ । नेपाली घरेलु लिग एभरेस्ट प्रिमियर लिगमा भैरहवा ग्लाडियटर्सको प्रशिक्षकको भूमिकामा रहनेछन् । नेपाली टोलीलाई सफल बनाएका उन पुनः नेपाल आउने मनसाय बनाएको बुझिएको छ ।

ब्याटिङ प्रशिक्षकका रूपमा एकपटक नेपाल आएको सुबोधभाई देसाई पनि हाल नेपाली टोलीको प्रशिक्षका लागि रोजिएका मुख्य पात्र हुन् । नेपाली टोलीमा नै एकपटक ब्याटिङ प्रशिक्षकको भूमिका निभाएका उनलाई थप सहज हुनेछ । 

स्कटल्यान्डका नेइल क्याक्रेइ पनि क्यानका लागि पहिलो रोजाइको प्रशिक्षकमा परेका छन् ।