काठमाडौं । घरेलु क्रिकेटमा उमेर समूहका प्रतियोगिता हुन छोडेको लामो समय भएको छ । सन् २०१४ यता नेपालमा यू–१९ का राष्ट्रिय प्रतियोगिताहरु भएका छैनन् । यसको असर खेलाडी उत्पादनमा परेको छ । यसबाहेक राष्ट्रिय क्रिकेट टोलीमा लामो समयदेखि अधिकांश खेलाडी पुरानै छन् । 
 
पछिल्लो समय नेपाली टोली तयार पार्दा एकेडेमीमा खेलिरहेका खेलाडीहरु मात्र ट्यालेन्ट हन्टका आधारमा घरेलु लिगमा खेल्ने गरेका छन् । उनीहरुले राष्ट्रिय स्तरको प्रतियोगिताभन्दा एकेडेमीमा सिकेको क्रिकेटका कारण नेपाली घरेलु लिग एभरेस्ट प्रिमियर लिग (ईपीएल), धनगढी प्रिमियर लिग (डीपीएल), पोखरा प्रिमियर लिग (पीपीएल)मा खेल्न पाउँछन् ।
 
त्यसबाहेक नेपालमा पछिल्लो समय खेलाडी उत्पादनको लागि अन्य कुनै विकल्प छैन । नेपालमा उमेर समूहका केही प्रतियोगिता नभएका भने होइनन् । तर, राष्ट्रिय स्तरको प्रतियोगिता नभएको लामो समय भयो । एकेडेमी स्तरबाट यू–१६, यू–१४ स्तरको प्रतियोगिता भने भएका छन् । 

क्यानले नयाँ नेतृत्त्व पाएसँगै उमेर समूहका क्रिकेट प्रतियोगिताका लागि प्रश्न उठ्न थालेको छ । सिनियर टिमको खेलहरु हुनु र युवा खेलाडी छनोटका खेलहरु नहुँदा राष्ट्रिय टोलीमा पुरानै अनुहार देखिने खेल प्रेमीको गुनासो छ । यस विषयमा भने नेपाल क्रिकेट संघ (क्यान) आफूहरु उमेर समूहको प्रतियोगिता गर्ने कुरामा सकारात्मक भएको बताउँछ । 

क्रिकेट संघका सचिव अशोकनाथ प्याकुरेलले आफूहरुले उमेर समूहको क्रिकेट प्रतियोगिताका लागि योजना बनारहेको बताए । उनले कोरोनाको त्रास हट्न वित्तिकै प्रतियोगिताका लागि प्रक्रिया अगाडि बडाउने बताए । साथै उमेर समूहको प्रतियोगिता गर्न स्पोन्सरको पनि आवश्यक्ता पर्ने भएकाले त्यसका लागि पनि आफूहरुले प्रयास गरिरहेको बताए । 

“उमेर समूहको प्रतियोगिता नै नगर्ने भन्ने होइन । हामीले त्यसका लागि प्रयास गरिरहेका छौं । कोरोना महामारी अन्त्य हुने वित्तिकै हामीले प्रतियोगिताको कामलाई अघि बढाउने छौं । त्यसका लागि स्पोन्सर पनि खोजिरहेका छौं । उमेर समूहका खेलहरु नहुँदा हामीलाई पनि खेलाडी उत्पादनमा असहज भएको छ,” प्याकुरेलले भने । 

प्याकुरेलले अर्काे वर्षको वार्षिक कार्यक्रमको पहिलो लक्ष्य नै यू–१९ क्रिकेट प्रतियोगिता रहेको बताएका छन् । उनले त्यसका लागि क्यानले कार्ययोजना बनाइसकेको र स्पोन्सरको कुरा पनि पूरा भएको बताए । 

नेपाली यू–१९ पुरुष क्रिकेट टोलीका पूर्व प्रशिक्षक विनोद दास पनि उमेर समूहको प्रतियोगिता नहुँदा खेलाडी छनोट र उत्पादनको कुरामा असहज भएको बताउँछन् । खेलाडी उत्पादनको मुख्य पाटो नै उमेर समूहका प्रतियोगिताहरु भएकाले क्यानले यसलाई प्रथामिकताका साथ हेरेको बताए । क्यानका व्यवस्थापक समेत रहेका दास नेपाली राष्ट्रिय क्रिकेट टोलीका पूर्व कप्तान पनि हुन् ।
 
“खेलाडी उत्पादनको मुख्य जग भनेकै उमेर समूहका प्रतियोगिताहरु हुन् । पछिल्लो समय उमेर समूहका प्रतियोगिता नहुँदा नेपाली क्रिकेटमा नयाँ अनुहारको पनि कमी छ । क्यानले उमेर समूहको राष्ट्रिय प्रतियोगितालाई मुख्य प्रथामिकताका साथ हेरेको छ । राष्ट्रिय खेलाडी उत्पादनको मुख्य पाटो नै बन्द हुँदा नेपाली सिनियर टोलीका लागि पनि सहज पक्कै हुँदैन,” दासले भने ।
 
आईसीसीले क्यानलाई निलम्बन गर्नु पूर्व नेपालमा महिला तथा पुरुषको यू–१९ क्रिकेट प्रतियोगिता भएको थियो । त्यसयता नेपालमा घरेलु स्तरमा उमेर समूहको प्रतियोगिता भएको छैन । २०७५ सालमा क्यानको नयाँ कार्यसमिति आउँदा पनि घरेलु स्तरमा उमेर समूहको प्रतियोगिता भने भएको छैन् ।
 
एसिया, अमेरिका र इष्ट एसिया–प्यासिफिक क्षेत्रको यु–१९ विश्वकप छनोट प्रतियोगता रद्ध गर्दा नेपाली टोलीले विश्वकप क्रिकेट खेल्ने बाटो टुटेको छ । अन्तर्राष्ट्रिय क्रिकेट परिषद् (आईसीसी)ले बिहीबार यु–१९ पुरुष विश्वकपको अमेरिका एसिया र इष्ट एसिया–प्यासिफिक क्षेत्रको छनोट प्रतियोगिता रद्ध गर्ने निर्णय सार्वजनिक गरेको छ । आईसीसीले कोभिड–१९ महामारीको कारण देखाउँदै प्रतियोगिता गर्न नसक्ने बताएको छ । प्रतियोगिता नहुने भएपछि २०२२ मा वेष्ट इन्डिजमा हुने प्रतियोगिताका लागि आईसीसीले युनाइटेड अरब इमिरेट्स (यूएई), क्यानडा र पपुवान्युगिनी (पीएनजी) छनोट भएको घोषणा गरेको छ । यससँगै नेपाली टोलीको विश्वकप खेल्ने सम्भावना समाप्त भएको छ ।