काठमाडौं । क्रियाशील सदस्यता विवाद समाधान समितिले गरेको निर्णय भोलि (बुधबार) बाट कार्यान्वयनमा आउने भएको छ । समितिले सोमबार १९ दिन लगाएर तयार पारेको १० बुँदे निर्णयको कार्यान्वयनको जिम्मा ५ जना केन्द्रीय सदस्यहरूलाई दिएको छ ।

निर्णय कार्यान्वयन गराउने जिम्मा आनन्द ढुंगाना, श्याम घिमिरे, जीवन परियार, प्रदीप पौडेल र योगेन्द्र चौधरीले पाएका छन् । निर्णय कार्यान्वयन समितिका सदस्य परियारले आफूहरूले बुधबारबाट काम सुरु गर्ने जानकारी दिए । उनले आफूहरूले पाएको जिम्मेवारीअनुसार काम गर्ने बताए ।

जसमा प्रदेश १ र २ सँग सम्बन्धित निर्णय कार्यान्वयन गराउने जिम्मा ढुंगाना र परियारलाई दिइएको छ । वाग्मती र गण्डकी प्रदेशका लागि घिमिरे र पौडेल तथा लुम्बिनी, कर्णाली र सुदूरपश्चिम प्रदेशका लागि परियार र योगेन्द्र चौधरीलाई जिम्मा दिइएको छ । 

जिम्वेवारी पाएका नेताहरू क्रियाशील छानबिन समितिमा बसेर काम गरिसकेका छन् । रमेश लेखक नेतृत्वको समितिमा उनीहरू पाँचै जना थिए । 

कांग्रेस केन्द्रीय कार्यसमितिको बैठकले साउन ३० गते क्रियाशील सदस्यता छानबिन समितिको प्रतिवेदन बमोजिम विवाद रहेका जिल्लाको समस्या समाधान गर्न तीन सदस्यीय समिति बनाएको थियो । कृष्णप्रसाद सिटौला नेतृत्वको समितिमा डा. मिनेन्द्र रिजाल र रमेश लेखक सदस्य थिए । भदौ २ गते प्रतिवेदन बुझाउन भनिएपनि समितिमा देखिएको मतान्तरले सोमबार राति समितिले प्रतिवेदन बुझाएको हो ।