काठमाडौं । नेपाली फुटबलमा विवाद चलेको लामो समय भयो । पछिल्लो समय वरिष्ठ उपाध्यक्ष र मुख्य प्रशिक्षकबीचको घम्साघम्सीले नेपाली फुटबलको विवाद उत्कर्षमा पुगेको छ। एन्फाभित्रै समाधान हुन नसकेपछि विवाद मन्त्रालय र राखेपसम्म पुगेको छ। राखेपद्वारा छानबिन समिति नै गठन गरेर सुल्झाउने प्रयास भइरहेको छ । 

विवाद छानबिन गर्न गठित समितिले भोली बुधबार प्रतिवेदन बुझाउने तयारी गरेको छ । 

मुख्य प्रशिक्षक अब्दुल्लाह अलमुताइरीले वरिष्ठ उपाध्यक्ष पंकज नेम्वाङका कारण आफूलाई काम गर्ने वातावरण नभएको भन्दै सामाजिक सञ्जाल फेसबुकमा समर्थकलाई सम्बोधन गर्दै साउन १० गते राजीनामा दिने घोषणा गरेका थिए । 

त्यसपछि तात्तिएको विवाद एन्फाभित्र नसुल्झिएपछि युवा तथा खेलकुद मन्त्रालय हुदै राखेपसम्म पुगेको छ । सबैको नजर अहिले पुरेन्द्रविक्रम लाखेको नेतृत्वमा बनेको छानविनको प्रतिवेदनमा अड्किएको छ । प्रतिवेदनमा के आउने हो सबैले चासोपूर्वक हेरेका छन् । 

नेम्वाङले प्रशिक्षकलाई कुनै किसिमको दबाब दिने क्रियाकलाप आफुले नगरेको दोहर्याउदै आएका छन् । 

प्रशिक्षकले फेसबुकमा स्टाटस लखेको एक सातापछि वरिष्ठ उपाध्यक्ष नेम्वाङले आफूमाथि षणयन्त्र भएको भन्दै छानबिनका लागि निवेदन दिए । त्यसको भोलिपल्ट मुख्य प्रशिक्षक अलमुताइरीले पनि दुई खेल पत्रकार र नेम्वाङविरुद्ध एन्फामा निवेदन दर्ता गराए । 

प्रशिक्षक–उपाध्यक्षबीचको विवाद सहजै नसुल्झिएपछि एन्फाले आकस्मिक कार्यसमिति बैठक बोलायो । उक्त बैठकमा पनि विवाद समाधान नभएपछि एन्फाले खेलकुद मन्त्रालयलाई गुहार्यो । खेलकुद मन्त्रालयले छानबिन गरी सात दिनभित्र विवाद मिलाउनका लागि राष्ट्रिय खेलकुद परिषद् (राखेप) लाई निर्देशन दियो । साउन १९ गते लाखेको संयोजकत्वको गठित ७ सदस्यीय छानबिन समितिले छानबिनका लागि थप एक साता समय लिएर बुधबार प्रतिवेदन सार्वजनिक गर्दैछ । 

नाम नखुलाउने सर्तमा समितिको एक सदस्य भन्छन्, ‘‘१० देखि १५ बुँदामा विवाद समाधानका उपाय सुल्झाएका छौं ।’

समितिले घटनामा संलग्न नेम्वाङ र अलमुताइरी तथा एन्फा अध्यक्ष कर्माछिरिङसहित २१ जनाको बयान लिएको थियो । 

प्रतिवेदनको निष्कर्ष नेम्वाङविरुद्ध आए के हुन्छ ?

अल्मुताइरीले फेसबुकमा स्ट्याटस राखेकै दिन वरिष्ठ उपाध्यक्ष नेम्वाङले आफ्नो गल्ति भए एन्फाको सदस्यसमेत नरहने गरी राजीनामा गर्ने बताएका थिए । र प्रशिक्षकको गल्ति ठहरिए उनलाई कारवाही गर्नुपर्ने माग राखेका थिए ।

बाह्रखरीसँगको कुराकानीमा वरिष्ठ उपाध्यक्ष नेम्वाङले प्रतिवेदनको निष्कर्ष जसको पक्षमा आए पनि आफुले स्विकार गर्ने बताएका छन् । 

‘‘छानबिन समितिमा पूर्व खेलाडीहरू नै हुनुहुन्छ । उहाँहरूले नेपाली खेलकुद राम्रोसँग बुझ्नु भएको छ । त्यसकारण पनि प्रतिवेदन निष्पक्ष आउनेमा म विश्वस्त छु,’’ नेम्वाङले भने । 

प्रतिवेदनको निष्कर्ष अलमुताइरीविरुद्ध आए के हुन्छ ?

मुख्य प्रशिक्षक अलमुताइरी कतार फुटबल संघको सहयोगमा नेपाल आएका हुन् । उनले एन्फाबाट कुनै पारिश्रमिक लिँदैनन् । उनको खाने बस्ने व्यवस्था भने एन्फाले गरिरहेको छ । 

नेपाली फुटबलको विकासका लागि आएको बताउने अलमुताइरीले साफ फुटबलको उपाधि जिताउने बताउँदै आएका छन् । 

तर नेपाल आएपछि उनी विभिन्न कारणले चर्चामा छन् । कहिले नेपाली टिमलाई फरक शैलीमा खेलाएको भनेर उनको चर्चा हुन्छ भने कहिले एन्फा पदाधिकारीविरुद्धको अभिव्यक्तिका कारण विवादमा मुछिन्छन् । केही न केही गरिरहने अलमुताइरी वरिष्ठ उपाध्यक्षसँगको विवादपछि भने उनी मौन छन् । 

यस विवादको प्रतिवेदन अलमुताइरीको विपक्षमा आए उनले नेपाल छाड्न सक्ने एन्फा उच्च पदाधिकारीको भनाई छ । 

उनी भन्छन्, ‘‘प्रशिक्षकलाई गलत ठहर्‍याएर माफी माग्न लगाइए उनी नेपाली फुटबलमा बसिराख्ने सम्भावना कम देखिन्छ । अलमुताइरीले एएफसी तथा कतार फुटबल संघमा निवेदन दिने सम्भावना छ ।’’ 

नेपाली फुटबल टिम अहिले भारतविरुद्धको मैत्रीपूर्ण खेल, साफ च्याम्पियनसिप र चीनमा एसिया कप छनोट प्रतियोगिताको तयारीका लागि पोखरामा बन्द प्रशिक्षण गरिरहेको छ । 

भारतसँग भदौ २० र २३ गते दशरथ रंगशालामा मैत्रीपूर्ण खेल खेल्ने नेपालले आसोज १५ देखी ३० गतेसम्म माल्दिभ्समा साफ च्याम्पियनसिप खेल्दैछ ।

यस्तो अवस्थामा एन्फा उच्च पदाधिकारीले भनेजस्तै अलमुताइरीले टिम छाड्लान् त ? नौतिक रुपमा प्रशिक्षक अलमुताइरीलाई दबाब त हुन्छ। तर वरिष्ठ उपाध्यक्ष नेम्वाङले दुई जनाबीचमा सहमती जुटिसकेको बताएका छन् । 

“मुख्य प्रशिक्षकले आफ्नो गल्ती स्वीकार गरिसक्नुभयो । मैले पनि अबदेखि गल्ती नगर्ने बताएको थिएँ । हामीबीच सहमति भइसकेको छ । तर हामीबीच समिति हुँदा समित बनेर थालिसकेकाले उसको निष्कर्ष कुरीरहेका हौं,” नेम्वाङले बाह्रखरीसँगको कुराकानीमा भने ।