काठमाडौं । प्रतिनिधिसभाअन्तर्गतको शिक्षा तथा स्वास्थ्य समितिले अतिरिक्त शुल्क नलिन निर्देशन दिएको छ । इन्जिनियरिङ कलेजको शुल्क विवाद सम्बन्धमा समितिको मंगलबार बसेको बैठकले यस्तो निर्देशन दिएको हो ।

कोभिड–१९ को संक्रमण कायमै रहेको र अरू क्रियाकलाप नभएको भन्दै पढाइ शुल्कबाहेक अतिरिक्त शुल्क नलिने व्यवस्था गर्न समितिले शिक्षा, विज्ञान तथा प्रविधि मन्त्रालयलाई निर्देशन दिएको हो ।

कोभिड–१९ को बेलामा अनलाइन पढे पनि भ्रमण, स्वागत एवम् बिदाइको खर्च लिएको भन्दै त्रिभुवन विश्वविद्यालयअन्तर्गतका १० निजी इन्जिनियरिङ कलेजका विद्यार्थीहरूले दुई सातादेखि आन्दोलन गरिरहेका छन् ।

यस्तै, समितिले कक्षा–१२ को परीक्षा भौतिक उपस्थितिमै खोपको व्यवस्थापन गर्दै ‘होम सेन्टर’मै परीक्षा गर्ने व्यवस्था गर्न निर्देशन दिएको छ ।