राज्य सञ्चालन गर्ने शासकहरू नै लाछी भए भने राष्ट्रिय स्वाभिमान पनि फोस्रो आडम्वर बन्न पुग्छ । दार्चुलाका जयसिंह धामीलाई भारतीय सुरक्षाकर्मीले तुइन फुस्काएर महाकालीमा खसालेको घटनामा नेपाल सरकारको लाछी व्यवहारले राष्ट्रिय स्वाभिमानमै चोट लागेको छ ।  
 
दार्चुला जिल्लाको व्यास गाउँपालिका– २ मालघाटमा तुइनबाट महाकाली तर्न लागेका बेला  भारतीय सुरक्षाकर्मीले तुइन चुँडाइदिँदा नेपाली नागरिक जयसिंह धामी नदीमा खसेर बेपत्ता भएको महिना दिन पुग्न लाग्यो । घटना सार्वजनिक हुनेबित्तिकै नेपाली जनमानस आक्रोशित भएको थियो भने सत्तारुढ नेपाली का‌ग्रेसकै प्रवक्ताले समेत छानबिन गरी  घटनाको वास्तविकता सार्वजनिक गर्न र भारतीय पक्षसँग संवाद गर्न सरकारको ध्यानाकर्षण गरेका थिए । 
 
घटनाप्रति देशभर आक्रोश प्रकट भएपछि सरकारले छानबिन समिति पनि गठन गरेको थियो । तर, छानबिन समिति गठन गरिएको तीन साता बढी भइसक्ता पनि प्रतिवेदन बुझाइएको छैन । सञ्चार माध्यमहरूमा प्रकाशित समाचारअनुसार समितिका दुई जना सदस्य अकस्मात बिदामा बसेकाले प्रतिवेदन तयारै गरिएको छैन । 
 
छानबिन समितिले घटनास्थलको भ्रमण गरेको र भारतीय पक्षले द्रोण उडाएर खोजतलास गर्नसमेत असहयोग गरेको समाचार यसअघि नै सार्वजनिक भइसकेको हो । नेपाल सरकारले भने यस विषयमा समिति गठन गरेकोदेखि बाहेक न अरू केही गरेको छ न घटनाका सम्बन्धमा केही बोलेको छ ।
 
राष्ट्रिय स्वाभिमान जोडिएको छानबिनको कामलाई सरकारले उच्च महत्त्व दिनुपर्थ्यो । समितिका कर्मचारी बिदामा नबसी नहुने कुनै कारण परेको भए सरकारले सट्टामा अर्को कर्मचारी खटाउनुपर्थ्यो । तर, सरकारको आलटालले घटना दबाएर सामसुम पार्न खोजेको सन्देह उत्पन्न भएको छ । 
 
अहिले नेपाल भ्रमणमा आएका भारतका सत्तारुढ दलका नेतालगायतसँग सरकार र विपक्षका नेताले यस विषयमा प्रश्न उठाएको भए सरकारले त्यसको जानकारी जनतालाई देओस् । प्रमुख विपक्षी नेताले पनि भारतीय नेतासँगको भेटमा जयसिंह धामीको हत्याको विषय उठाएका भए सार्वजनिक जानकारी दिनुपर्छ । 
 
दार्चुला घटनालगत्तै २०७८ साउन १६ को सम्पादकीय हामीले नेपाल सरकारलाई “तत्काल कूटनीतिक र प्रशासनिक दुवै माध्यमबाट भारत सरकारसमक्ष नेपालको विरोध दर्ज” गराउन माग गरेका थियौँ । साथै हामीले भारत सरकारले “दार्चुला घटनामा जघन्य अपराध गर्ने भारतीय सुरक्षाकर्मीलाई” कारबाही गर्न र पीडित धामी परिवारसँग क्षमायाचना गर्ने तथा क्षतिपूर्ति दिने नैतिक साहस” देखाउन आग्रह गरेका थियौँ । 
 
अहिले पनि हामी धामीको परिवारले न्याय र क्षतिपूर्ति पाउनुपर्छ र नेपाल तथा भारत सरकारले यस घटनालाई बेवास्ता गरेर थामथुम पार्ने हुँदैन भन्ने धारणा दोहो र्‍यfउँछौँ । यस्ता घटनालाई उपेक्षा गर्दा दुवै देशका जनतामा आक्रोश बढ्न सक्छ । 
 
विशेषगरी नेपाल सरकार यसबाट हुने क्षतिका सम्बन्धमा गम्भीर हुनुपर्छ । विदेशी सुरक्षाकर्मीको हातबाट आफ्नो देशको नागरिकको ज्यान गएको घटनामा पनि  लाचारी देखाउने सरकारले देशमा शासन चलाउने नैतिक अधिकार जो गुमाउँछ । नेपाल सरकार लाछी नबनोस् ।