जनकपुरधाम । प्रदेश २ का नवनियुक्त प्रदेश प्रमुख हरिशंकर मिश्रले पदभार ग्रहण गरेका छन् । बुधबार मधेश भवनस्थित प्रदेश प्रमुखको कार्यालयमा झाले पदभार ग्रहण गरेका हुन् ।
पदभार ग्रहण गर्दै प्रदेश प्रमुख मिश्रले शान्ति र अमनचयनका लागि काम गर्ने बताए । प्रदेश सरकारसँग समन्वय र सहकार्य गरेर अगाडि बढ्ने भन्दै उनले निष्पक्ष रूपमा आफ्नो कर्तव्य पूरा गर्ने बताए ।
प्रधानमन्त्री शेरबहादुर देउवा नेतृत्वको सरकारले प्रदेश प्रमुखमा नियुक्त गरे लगत्तै मंगलबार मिश्रले शपथ लिएका थिए । प्रदेश प्रमुखमा नियुक्त भएर जनकपुर आएका मिश्रलाई जनकपुर विमानस्थलमा स्वागत गरिएको थियो । प्रदेश सरकारका भौतिक पूर्वाधार विकासमन्त्री राम सरोज यादवसहित नेपाली कांग्रेसका नेता तथा कार्यकर्ताले विमानस्थलमा स्वागत गरेका हुन् ।
मिश्र महोत्तरीको पिपरा गाउँपालिकाको पिपरा बस्ने कांग्रेसका पुराना नेता स्वर्गीय रामनारायण मिश्रका छोरा हुन् ।